ԱՄՆ Միջազգային հանրապետական ինստիտուտը հրապարակել է Վրաստանում սոցհարցման տվյալներ, որոնք բավականին ուշադրության են արժանի նաև Հայաստանում: Ըստ իրականացված հարցման՝ Վրաստանի հանրության 64 տոկոսը Հայաստանի հետ հարաբերությունը գնահատում է դրական: Միաժամանակ, հարցվածների միայն 11 տոկոսն է Հայաստանը դիտարկում որպես գլխավոր գործընկեր: Իսկ որպես առաջնահերթ տնտեսական գործընկեր Հայաստանը դիտարկվում է միայն հարցվածների 9 տոկոսի շրջանում: Այդ առումով Վրաստանում Հայաստանին գերազանցում են թե՛ Ադրբեջանը, թե՛ Թուրքիան:
Վրաստանի հարցերով փորձագետ Ջոնի Մելիքյանի խոսքով՝ հարցման առաջին տեղը գրաված պետությունները Վրաստանի արտաքին քաղաքականության հիմնական ուղղություններն են՝ Եվրամիություն, Միացյալ Նահանգներ: «Եթե մի կողմ դնենք քաղաքականությունը, այս պատկերը ռեալ գնահատում է իրականությունը։ Նայեք, թե ինչքանով է ներկայացված Հայաստանը իրենց լրատվամիջոցներում, ինչ ենթատեքստով է ներկայացված, ինչպիսի տեղեկատվություն է տրամադրվում։ Բնականաբար, այս ամենը ազդում է հարցման արդյունքների վրա։ Ինչն է հետաքրքիր՝ Չինաստանն ու Իրանը ևս մեծ դերակատարություն ունեն, ինչը նկատելի է նաև Հայաստանի պարագայում»,- «Առաջին լրատվական»-ի հետ զրույցում ասաց նա։
Մելիքյանի դիտարկմամբ՝ կարծիքի ձևավորման հարցում մեծ դերակատարություն ունեն լրատվամիջոցները, քաղաքական գործիչները. «Անընդհատ Եվրոպա, Արևմուտք, Ասոցացման համաձայնագիր, վիզային ռեժիմի թեմաներ… սա բնականաբար իր անդրադարձն է ունենում բնակչության ձևավորման հարցում։ Քանի որ անընդհատ մամուլում ու սոցցանցերում մենք տեսնում ենք թեմաներ, որոնք կապված են Եվրոպայի ու Արևմուտքի հետ, հասարակությունը այս ամենից իր տեսակետն է ձևավորում»։
Մեր զրուցակցի խոսքով՝ քանի որ ոչ դրականով, ոչ բացասականով Հայաստանի հետ կապված ակտիվությունը Վրաստանի տեղեկատվական դաշտում շատ չէ, մենք հետևաբար ո՛չ առաջնային հորիզոնականներում ենք, ոչ էլ բացասական հիշատակումներում կանք. «Բայց կա նաև այսպիսի հանգամանք. եթե, օրինակ, Արևմուտքի մասին հիշատակումները դրական են, ապա Թուրքիայի ու Ադրբեջանի մասին կարծիքները տարբեր են»։
Ինչ վերաբերում է այն տեսակետներին, թե Հայաստանի հանդեպ վերաբերմունքը պայմանավորված է նաև այն հանգամանքով, որ Հայաստանը Ռուսաստանի ազդեցության տակ գտնվող երկիր է, Ջոնի Մելիքյանը նշեց. «Չէի ասի, որ այդ հարցը կապ ունի։ Հայաստանի հետ կապված առաջ են քաշվում Ջավախքի հարցը, մշակութային կոթողների հետ կապված տարբեր հարցեր, որոնք Ռուսաստանի հետ կապված չեն, այլ ավելի տարածաշրջանային բնույթի խնդիրներ են։ Թուրքիայի պարագայում այս հարցն ավելի վառ է արտահայտված՝ Աջարիայի հետ կապված խնդիրներ, տնտեսական ներդրումներ։ Այսօր արդեն առաջացել են հարցեր Նամախվանի ՀԷԿ-ի հետ կապված։ Վրաստանում Թուրքիայի դեսպանի հայտարարությունները ևս մի հատվածի մոտ դժգոհություն առաջացրին։ Հարցման արդյունքները մեծ հաշվով ցույց են տալիս, որ վրացիները եվրոպական ու արևմտյան երկրներից միայն լուրջ վտանգ չեն տեսնում, իսկ մնացած պետությունների հետ կապված կան որոշակի մտահոգություններ»։