ՀՀ ոստիկանության Մալաթիայի բաժնի ծառայողները բերման են ենթարկել Գեղարգունիքի գյուղերից մեկի բնակիչ 58-ամյա կնոջ, որ գողություններ էր կատարել Երևանի Օհանովի փողոցում գտնվող խանութից։
Ինչպես տեղեկացրին ՀՀ ոստիկանության հասարակայնության հետ կապերի և լրատվության վարչությունից, Մալաթիայի բաժնի քրեական հետախույզները օպերատիվ տվյալներ էին ստացել, որ Գեղարքունիքի մարզի գյուղերից մեկում բնակվող 58-ամյա մի կին Երևանի Օհանովի փողոցի մի խանութից գողություններ է արել։
Ըստ աղբյուրի՝ կասկածվողը հայտնաբերվել ու բերման է ենթարկվել բաժին։ «Նյութերի նախապատրաստման ընթացքում պարզվեց, որ բերման ենթարկվածը մի քանի օրվա ընթացքում նույն խանութից երեք տասնյակից ավելի գողություն էր արել՝ գաղտնի հափշտակելով տարբեր իրեր, որոնց մի մասը հայտնաբերվել և առգրավվել է։ Դեպքերի հանգամանքները պարզվում են»,- ասվում է հաղորդագրության մեջ։
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
