Ի՞նչ տեղ է զբաղեցնում քաղաքական նորությունը քո կյանքում․ «Առաջին լրատվական»-ի հարցին երգահան Եղիշե Պետրոսյանը պատասխանեց․ «Ասեմ՝ շատ կարևոր տեղ է զբաղեցնում։ Երբեմն չեմ հասցնում հետևից։ Չեմ հասցնում նաև աբսուրդին հետևել․ աբսուրդը շատ-շատ է, կասեի՝ ֆանտաստիկ շատ, աններելի շատ։ Մեր երկրի իշխանությունները դրսևորում են ամենահիմար որակները, և կարծես՝ այդ թունելի վերջում լույս չի երևում։ Քանի որ Հայաստանը իշխանությունն է ղեկավարում, և նրա արած քայլերն են մեր ճակատագրի հետ կապված, բնականաբար, առաջին հերթին այդ իշխանության քայլերն են հետաքրքրում, որովհետև քաղաքական դաշտ՝ որպես այդպիսին, չկա և մինչ այժմ մենք քաղաքական կուսակցություններ չունենք։ Դրանք ինչ-որ թայֆաներ են, կլաններ են։ Հիմքն այդպես է դրվել, որպեսզի երկիր՝ որպես այդպիսին, չլինի, և հիմա էլ շարունակվում է։ Առջևում ընտրություններ են, որը ոչ մի լավ բան չի խոստանում։ Այսինքն՝ լավ, ընտրություն եղավ, ի՞նչ է փոխվելու»։
Իսկ քանդակագործ Վիգեն Ավետիսն ասաց․ «Ճիշտն ասած՝ ոչ։ Իմ կյանքում քաղաքական նորությունը մեծ տեղ չի զբաղեցնում։ Ես որոշել եմ քաղաքականությամբ ընդհանրապես չզբաղվել, որովհետև ինչքան կարողացանք՝ արեցինք։ Ես իմ սահմանները գիտեմ, դրանից ավելի ես քաղաքական կյանքում ներդրում անելու հնարավորություն չունեմ։ Ցավոք, տեղում ենք դոփում արդեն 30 տարի։ Երկուսուկես տարի հետո եկանք հասանք մի կետի, որտեղ պատերազմով պետք է լուծեինք մեր հարցերը։ Լուծեցինք։ 44 օր կռվեցինք։ Ես ոչ մեկին այլևս չեմ մեղադրում։ Հերիք է՝ ինչքան մեղադրեցինք։ Այսօր մեղադրելով գործն առաջ չի գնա։ Ես ուզում եմ պետությունը կայանա։ Մինչ քաղաքականությունը մեր պետությունը պետք է հոգևոր կայանա, և վերջիվերջո հասկանանք՝ ով ենք մենք, ինչ ենք ուզում և ինչի համար ենք ուզում այդ ամենը։ Եկեք սրա մասին մտածենք»։
Գրահրատարակիչ Արմեն Մարտիրոսյանն էլ ասաց․ «Այն, ինչ տեղի է ունենում այսօր՝ մեդիահիգիենայի բացակայություն է։ Եթե մեր ծնողը մեզ սովորեցնում էր օրը երկու կամ երեք անգամ ատամները լվանալ, լողանալ, մի քանի անգամ լվացվել, ապա մեդիայի հետ վարմունք մեզ չեն սովորեցնում։ Օրինակ, եթե մի տեղ կանալիզացիա է պայթել, ապա մենք աշխատում ենք այդ գարշահոտից հեռու մնանք։ Բայց երբ այդ կանալիզացիան խոսքով է ասվում, այդ դեպքում մեզ չեն սովորեցրել հեռու մնալ այդ գարշաձայնից, որովհետև դա աղտոտում է քո հոգին, դա աղտոտում է քո միտքը, և այլն։ Ես կուզեի, որ դրա վրա ուշադրություն դարձնի հանրությունը»։
Մանրամասները՝ տեսանյութում։
