ՀՀԿ-ական նախկին պատգամավորները, ՀՀԿ-ական գործող քաղաքապետերն ու համայնքապետերը սրտատրոփ սպասում են կուսակցության որոշմանը՝ մասնակցելո՞ւ են արտահերթ խորհրդարանական ընտրություններին, թե՞ ոչ։ Թեև ՀՀԿ-ում ներքին քննարկումներից արդեն պարզ է դառնում, որ հակված են չմասնակցելու, բայց պաշտոնական որոշում դեռ չկա։
ՀՀԿ-ականներին կուսակցությունից դեռևս չեն հուշում նաև, թե ում համար են աշխատելու։
Սպիտակի ՀՀԿ-ական քաղաքապետ Գագիկ Սահակյանը «Առաջին լրատվական»-ի հետ զրույցում ասաց, որ ոչ մի որոշում չունեն, սպասում են կուսակցության որոշման հրապարակմանը։ Սահակյանը նաև ասաց, որ առհասարակ կասկածում է, որ ընտրություններ կլինեն: «ՀՀԿ-ն դեռ որոշում չունի, դա կոլեգիալ որոշում է, երբ լինի՝ բոլորդ դրա մասին կիմանաք։ Թույլ տվեք իմ անձնական մոտեցումների, հակվածության մասին ձեզ չասեմ։ Սպասենք տեսնենք, թե ինչ է կատարվում։ Ի վերջո, դեռ ընտրությունները նշանակված չեն։ Սուտը մեր երկրում իր տեղը ունի, բայց ընտրությունները նշանակված չեն, և պետք չէ ջուրը չտեսած բոբիկանալ»,- ասաց Սպիտակի քաղաքապետը։
Մեր դիտարկմանը՝ կասկածնե՞ր ունի, որ ընտրություններ ամեն դեպքւմ կլինեն, Սահակյանը պատասխանեց. «Իհարկե ունեմ։ Այնքան սուտ եմ տեսել այս իշխանությունների կողմից, որ իրավունք ունեմ կասկածելու։ Ընտրություններն էլ իշխանություններն են անցկացնելու, բնականաբար չեմ հավատում իրենց»։
Սահակյանից նաև հետաքրքրվեցինք՝ եթե ՀՀԿ-ն որոշում կայացնի ամեն դեպքում չմասնակցել ընտրություններին, ունե՞ն ֆավորիտ կուսակցութուն, քաղաքական ուժ, որի համար կցանկանան աշխատել, ձայն հավաքել, Սահակյանը պատասխանեց. «Ոչ դեռ։ Ինձ համար ֆավորիտը միայն ՀՀԿ-ն է։ Մնացածը՝ կուսակցության որոշումից հետո»։
Արարատի մարզի մի քանի ՀՀԿ-ական գյուղապետեր ևս մեզ հետ զրույցում ասացին, որ դեռ ոչ մի բան պարզ չէ։ Սպասում են ՀՀԿ-ի վերջնական որոշմանը։ Իսկ եթե ՀՀԿ-ն որոշում կայացնի չմասնակցել ընտրություններին, ապա կասի նաև, թե ինչ պետք է անել և որ ուժին սատարել։
ՀՀԿ-ական նախկին պատգամավոր, բնապահպանության նախկին նախարար Մուրադ Մուրադյանն էլ «Առաջին լրատվական»-ի հետ զրույցում ասաց, որ չեն շտապում կարծիք հայտնել, սպասում են ՀՀԿ-ի վերջնական որոշմանը: «Հենց ՀՀԿ-ն վերջնական որոշի չմասնակցել, ես իմ կարծիքը կասեմ։ Մոտակա ժամանակներս արդեն ամեն ինչ պարզ կդառնա։ Դրա համար չեմ ուզում առաջ ընկնել ու իրականությանը չհամապատասխանող բաներ ասել»,- ասաց Մուրադյանը։
Իսկ Դուք այս պահին ընտրություններին մասնակցելու հայտ ներկայացրած քաղաքական ուժերի, անհատների մեջ ֆավորիտ ուժ, գործիչ ունե՞ք, Քոչարյանին կսատարե՞ք՝ հարցին նախկին պատգամավորը պատասխանեց. «Ոչ։ Ռոբերտ Քոչարյանին՝ ոչ։ Մնացածից կորոշեմ՝ որ ուժին կսատարեմ, բայց որ Ռոբերտ Քոչարյանին միանշանակ դեմ եմ լինելու, դա հաստատ է»։
ՀՀԿ-ական մեկ այլ պատգամավոր՝ Սուքիաս Ավետիսյանը ևս մեզ հետ զրույցում ասաց, որ դեռ սպասում են կուսակցության որոշմանը, բայց ինքը հակված է, որ մինչև ընտրությունները լուծվի պետությունը այս իշխանություններից ազատելու հարցը. «Ինձ համար ամենաառաջնայինը այս իշխանություններից պետությունը և ժողովրդին ազատելն է։ Այդ ծանր պարտավորությունից հետո նոր կորոշենք ինչ անել, ինչ՝ ոչ։ Ինձ համար, որպես ՀՀ քաղաքացի, թիվ մեկ խնդիրը, կրկնում եմ, այս իշխանություններից ազատվելն է։ Իսկ ինչ վերաբերում է ընտրություններին մասնակցող մնացած ուժերին, ապա դրանք ինձ դեռևս ոչինչ չեն ասում»։
– Քոչարյա՞նն էլ ոչինչ չի ասում։
– Ես անձերի մասին ոչինչ չեմ ասում։ Ես խոսում եմ ուժերի մասին։ Անձերի դեպքում կխոսեմ այն ժամանակ, երբ կլինի համապատասխան հայտ։ Բայց ինձ համար կարևորը, կրկնում եմ, այս իշխանություններից օր առաջ ազատվելն է։
– Դուք անձնապես հակված չե՞ք սատարելու Քոչարյանին։
– Կրկնում եմ՝ անձերի մասին կոնկրետ կխոսեմ այն ժամանակ, երբ որ այս իշխանությունից երկիրը ազատվի։
– Իշխանություններից ազատվում են ընտրությունների միջոցով նոր իշխանություն ընտրելով։ Դուք ո՞ր ուժի միջոցով եք պատկերացնում նոր իշխանությունը։
– Ոչ։ Կարելի է իշխանություններից ազատվել մինչև ընտրությունները և նոր մտածել ընտրությունների մասին ու նոր իշխանություն ունենալու մասին։
– Դուք ինչպե՞ս եք դա պատկերացնում։ Ինչպե՞ս պետք է մինչև ընտրություններն ազատվեք իշխանությունից։
– Դրա տարբեր ձևերը կան։
– Օրինա՞կ։
– Օրինակ համար՝ մեկ ձևը այն է, որ դավաճանը ինքը հրաժարական տա ու գնա։
– Իշխանությունը չի պատրաստվում հրաժարական տալ։ Դրա մասին արդեն հայտարարել է Նիկոլ Փաշինյանը։ Որպես երկրորդ տարբերակ ո՞րն եք դիտարկում։
– Ասելը քիչ է։ Նիկոլ Փաշինյանի որևէ ասած հիմք չի կարելի ընդունել։
– Շարունակո՞ւմ եք որպես երկրորդ տարբերակ վարչապետին ֆիզիկապես վերացնելը դիտարկել։ Մեկ քրեական գործ կա արդեն դրա վերաբերյալ, որով մի քանի ՀՀԿ-ականներ են անցնում, այդ թվում՝ Ձեր նախկին նախարարն ու խմբակցության նախկին ղեկավարը։
– Ֆիզիկապես ոչնչացնել չէ, բայց կարելի է և քրեական գործ հարուցել։
– Քրեական գործ ի՞նչ հոդվածով։
– Էնքան հիմքեր կան, հիմա ես չթվարկեմ։
– Իսկ Դուք անձնապես հակվա՞ծ եք, որ ՀՀԿ-ն մասնակցի ընտրություններին։ Ձեր կարծիքով՝ ՀՀԿ-ն դեռ ընտրազանգված ունի՞։
– ՀՀԿ-ն միշտ էլ ունեցել է և ունի ընտրազանգված։ Մնացածը, վերջնական որոշումը կախված է իրադարձությունների զարգացումից։ Իրադարձությունները ցույց կտան, թե ինչ որոշում կկայացվի։