Մոսկվայում Հայաստանի վարչապետ Նիկոլ Փաշինյանի հանդիպումը «Հայ իրավաբանների ասոցիացիայի» անդամների հետ անակնկալ է եղել հայ համայնքի համար: Այս մասին «Առաջին լրատվական»-ի հետ զրույցում նշեց Russia-armenia.info լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ, հասարակական գործիչ Արամ Խաչատրյանը՝ անդրադառնալով հարցին, թե ինչպես է գնահատում տեղի ունեցած հանդիպումը, որքանով է այն կարևորվում:
«Հանդիպումը տեղի է ունեցել անակնկալ, այսինքն՝ հայ համայնքում ոչ ոք տեղեկացված չի եղել, որ հանդիպում է լինելու Նիկոլ Փաշինյանի հետ: Մինչև վերջին պահը գաղտնի է եղել, թե ով է կազմակերպել հանդիպումը: Միայն շատ ավելի ուշ տեղեկություն ստացանք, որ այն կազմակերպել է «Հայ իրավաբանների ասոցիացան», որը ղեկավարում է Շահեն Պետրոսյանը: Շահեն Պետրոսյանը ղեկավարել է ժամանակին Ռուսաստանի հայերի միության Մոսկվայի կազմակերպությունը:
Մնացած կազմակերպություններից ոչ մեկին չեն հրավիրել, և մեզ համար շատ վիրավորական էր, որ չեն հրավիրել: Հետևաբար՝ մենք չգիտենք, թե ինչ հարցեր են այնտեղ քննարկվել, ինչ հարցեր են հնչել և այլն»,- ասաց նա:
Արամ Խաչատրյանի խոսքերով՝ իրենք մամուլից, սոցիալական ցանցերից տեղեկություններ են ստացել, որ այդ հանդիպմանը մասնակցելու համար մարդկանց ընտրել են. «Այնտեղ կան հայտնի փաստաբաններ: Պարզվում է, որ մարդկանց տվել են կոնկրետ հարցեր, այսինքն` հանդիպումը նախապես պատրաստել էին: Հայ համայնքում զարմացած են, որ Մոսկվա է եկել Հայաստանի վարչապետը, որը անտեսել ու չի հանդիպել իրենց հետ:
Ամեն դեպքում ցավալի է, որ չի կազմակերպվել հանդիպում հայկական համայնքի հետ: Եթե լիներ այդպիսի հանդիպում, մենք էլ հարցեր կտայինք, այդ թվում՝ ռազմագերիների, պատերազմի ավարտի, հաղորդակցությունների ապաշրջափակման հետ կապված»:
