ԱՄՆ նախագահ Ջո Բայդենի վարչակազմը դիտարկում է երկրից ռուս դիվանագետներին վտարելու և նոր պատժամիջոցներ սահմանելու հնարավորությունը՝ ի պատասխան Ռուսաստանին վերագրվող թշնամական գործողությունների: Այս մասին հաղորդում է Bloomberg-ը՝ ԱՄՆ անանուն պաշտոնյաներին հղումով:
Նրանց խոսքով, Սպիտակ տան վարչակազմն ավարտել է Ռուսաստանի կողմից ենթադրյալ «իրավախախտումների» հետաքննությունը, ներառյալ ընտրություններին ենթադրյալ միջամտությունը և Solar Winds ծրագրի օգնությամբ կիբերհարձակումները պետական հաստատությունների վրա:
Աղբյուրների համաձայն, հավանական պատասխան քայլերի թվում դիտարկվում են պատժամիջոցների կիրառումը անհատների և ՌԴ-ում գործող կազմակերպությունների նկատմամբ, ինչպես նաև «ռուսական հետախուզության աշխատակիցների վտարումը», որոնք, ըստ Վաշինգտոնի, կարող են ԱՄՆ-ում գտնվել «դիվանագիտական քողի ներքո»:
Ապրիլի 7-ին Սպիտակ տան մամուլի քարտուղար Ջեն Փսակին հայտարարել էր, որ ԱՄՆ-ը մի քանի օրվա ընթացքում կպատասխանի կիբերհարձակմանը և այլ գործողություններին, որոնցում ներգրավված է Ռուսաստանը:
NYT պարբերականը գրել էր, որ առաջիկա երեք շաբաթների ընթացքում ԱՄՆ-ը նախատեսում է կիբերհարձակումներ իրականացնել ռուսական ցանցերի դեմ՝ ի պատասխան SolarWinds ընկերության ծրագրակազմի վրա հարձակման, որում ամերիկյան կողմը կասկածում է Ռուսաստանին: