«Ինձ համար ամենակարևոր խնդիրն այն էր, որ խոսվեց ռազմագերիների մասին: Սակայն ժամանակը ցույց կտա, թե դա ինչ արդյունք կտա: Ես բավականին թերահավատորեն եմ վերաբերվում այս գործընթացին, որովհետև մեր ռազմավարական դաշնակից Ռուսաստանը ևս տեսնում է, որ Հայաստանի Հանրապետությունում որևէ կերպ չեն նվազել հակառուսական քայլերն ու քաղաքականությունը»,- «Առաջին լրատվական»-ի հետ զրույցում ասաց «Ժողովրդավարական համախմբում» կուսակցության նախագահ Սուրեն Պետրոսյանը՝ անդրադառնալով վարչապետ Փաշինյանի Մոսկվա կատարած այցին:
Նրա խոսքով՝ չպետք է տառապենք միֆերով կամ ունենանք չհիմնավորված պատրանքներ, որովհետև յուրաքանչյուր գերտերության համար կարևորագույն խնդիրը սեփական շահի սպասարկումն է. «Մեր խնդիրն է, որ ինքներս սահմանենք մեր սեփական ազգային շահը, դա համադրենք գերտերությունների շահերի հետ և այդտեղից մեզ համար քաղենք առավելագույնը: Մինչդեռ մենք հիմա առաջ ենք տանում թյուրքականությունը»:
«Հիմա Մոսկվայից «դաբրո» ստանալը ընտրողների վրա կամ քիչ ազդեցություն ունի, կամ ընդհանրապես չունի: Հիմա ընտրողները այլ բաներ են պահանջում քաղաքական գործիչներից»,- «Առաջին լրատվական»-ի հետ զրույցում նշեց քաղաքագետ Արմեն Վարդանյանը և հավելեց, որ իր կարծիքով՝ Փաշինյանի Մոսկվա կատարած այցը կապ չունի գալիք ընտրությունների հետ:
Նրա խոսքով՝ Ռուսաստանը ուղղակիորեն չի խառնվի Հայաստանի ընտրություններին. «Դա կարող է լինել անուղղակի կերպով. Հայաստանում գործող ռուսական ընկերությունների աշխատողներին կարող են հրահանգել քվեարկել այս կամ այն թեկնածուի օգտին»:
Սուրեն Պետրոսյանը ակնհայտ է համարում, որ ընտրությունները լինելու են երկու բևեռների միջև, ինչը ազգային անվտանգության սպառնալիք է:
Առավել մանրամասն՝ տեսանյութում: