«Առաջին լրատվական»-ի հարցերին պատասխանել է պաշտպանության նախկին փոխնախարար, գեներալ Գագիկ Մելքոնյանը:
– Պարոն Մելքոնյան, վերջին շրջանում շատ էր խոսվում բանակի վերազինման անհրաժեշտության մասին: Նիկոլ Փաշինյանը ևս առաջնային է համարել բանակում ժամանակակից զենքերի համալրումը և խոսել բանակում լայնամասշտաբ բարեփոխումների մասին: Դուք ինչպե՞ս եք պատկերացնում այդ բարեփոխումները:
– Այո, բանակում բարեփոխումները պարտադիր են, առաջնահերթ բանակը պետք է վերազինվի, մենք պետք է ունենանք արդիական զենքեր: Հերիք է մուրացկանի դերում ապրենք, հույսը դնենք ուրիշների վրա: Դարերով մեր հույսը դրեցինք ուրիշների վրա, մեկ անգամ ենք հույսը մեզ վրա դրել ու հաղթել ենք: Ու նորից հույսը դրեցինք ուրիշի վրա ու պարտվեցինք: Դրա համար առաջնահերթությունը բանակը զինելն է, պետք է սոված էլ մնանք, բայց մեր բանակը զինենք արդիական զենքերով: Պետք է կառուցվածքային փոփոխություն լինի բանակում: Ամեն մարդ իր արածի համար պետք է պատասխան տա, ամեն մարդ պետք է կարողանա ուժերի գերագույն լարումով աշխատել բանակի համար, ոչ մի բան չպետք է խնայենք բանակը զարգացնելու համար:
– Դա ենթադրում է նաև կադրայի՞ն փոփոխություններ:
– Պարտադիր, առաջնահերթությունը հենց կադրային փոփոխությունները պետք է լինեն:
– Զինված ուժերի Գլխավոր շտաբի շուրջ ստեղծված իրավիճակը դուք կարգավորված համարո՞ւմ եք:
– Ոչ, դեռ կարգավորված չէ, պետք է կարգավորվի: Այդ բարեկամ, հարազատ թայֆաբազությունը պետք է վերանա բոլոր տեղերից:
– Այսինքն՝ այս երեք տարում դա տեղի չի ունեցել և այս իշխանությունների մե՞ղքն է, որ այս ընթացքում բանակը չգնաց բարեփոխումների:
– Իշխանություններն ի՞նչ պետք է անեն, նրանք իշխանության գալով նշանակել են նոր նախարար, Գլխավոր շտաբի նոր պետ, նրանք էլ պետք է աշխատեին, փոփոխություններ անեին՝ թե՛ կադրային, թե՛ կառուցվածքային: Իրենք պետք է առաջին հերթին արդիական զենքերի մասին մտածեին, ոչ թե ինքնաթիռների և այլն: Ինչու մինչև այդ նույնիսկ առաջին, երկրորդ, երրորդ գիծ չկար:
– Ռոբերտ Քոչարյանը Պոզներին հարցազրույց էր տվել, որտեղ հայտարարել էր, թե վերջին 3 տարվա ընթացքում հետևողականորեն քայքայվել է Հայաստանի ԶՈՒ մարտունակությունը: Ինչպե՞ս եք գնահատում այդ հայտարարությունները, և արդյոք արդարացի՞ է ամեն ինչի մեղքը բարդել իշխանությունների վրա:
– Իրենց թողած ժառանգությունն է բանակը: Իրենք պետք է զինեին, նոր սպառազինություն գնեին: Ի՞նչ պետք է անեին մարդիկ երեք տարում: Երեք տարում մարդն ի՞նչ կարող է անել: Դրա համար մեծ փողեր են պետք, իսկ այդ փողերն ո՞ւր են, այդ հարցին թող իրենք պատասխանեն, ինչո՞ւ մինչ այդ բանակը չի զինվել: Ուրիշի վրա մեղք բարդելը շատ հեշտ է, բայց առաջին հերթին մտածի, որ դու ես էնտեղ եղել, դու ես առաջին դեմքը եղել, գերագույն գլխավոր հրամանատար ես եղել, ի՞նչ ես արել և ինչ չես արել, որի համար ափսոսում ես, որ չես արել:
– Ձեր կարծիքով՝ ի՞նչ նպատակ է հետապնդում Քոչարյանը՝ Ռուսաստանում հարցազրույց տալով ու քննադատելով իշխանություններին: Ուզում է առաջիկա ընտրություններում ունենալ Մոսկվայի աջակցությո՞ւնը:
– Ռուսաստանի իշխանությունները միշտ էլ իրեն աջակցել են ու աջակցում են, բայց մեր ժողովուրդը պետք է իր խոսքն ասի: Ինքը գնաց էնտեղ հարցազրույց տվեց, ու եթե մի քիչ հեղինակություն էլ ուներ, դա էլ կորավ: Իր կողմնակիցները հիմա արդեն տարբեր բաներ են խոսում: Ինքն ուզում է մեր ազգին սարքի վասալ:
– Կարծում եք՝ ընտրությունների ժամանակ հասարակությունը ցույց կտա՞ իր վերաբերմունքը Քոչարյանի նկատմամբ:
– Ես չգիտեմ, գուցե Քոչարյանը չդնի իր թեկնածությունը: Երբ դնի, նոր այդ ժամանակ մենք կարող ենք ինչ-որ բան ասել: Այսօր բանակի վերազինումը, վերակառուցումն ավելի կարևոր են, քան ընտրությունները, որովհետև ամեն օր լսում ենք՝ Զանգեզուրը տալիս են, էս տալիս են, էն տալիս են: Դրա համար պետք է շուտ ոտքի կանգնենք, մեր մեջքը դզենք, որ այդպիսի խոսակցություններ էլ չլինեն: Այդ խոսակցությունները տարածում են հենց ընդդիմություն կոչվածները, իրենք երկրի դավաճաններ են, որոնք անընդհատ սեպ են խրում, անընդհատ խանգարում են թե՛ բանակին, թե՛ իշխանություններին: