ՀՀ կառավարության առաջիկա նիստի օրակարգում գործադիրը հաստատելու է ներդրումային խոշոր մի ծրագիր, որն իրականացնում է «ՄԼ Մայնինգ» ՍՊ ընկերությունը։ Ընկերությունը արդեն իսկ հանքարդյունաբերության ոլորտում կատարել է 8 միլիարդ ՀՀ դրամի ներդրումներ և պատրաստվում է ևս մոտ 4 միլիարդ ՀՀ դրամի ներդրում կատարել: Ներդրումներով նախատեսվում է ձեռք բերել հանքարդյունաբերության համար տեխնիկա՝ ամբարձիչներ, կռունկներ, շինարարական տեխնիկա՝ բուլդոզերներ, բետոնախառնիչներ։ Նախատեսվում է ստեղծել մոտ 40-60 աշխատատեղ՝ միջինը 200-ից 300 հազար ՀՀ դրամ աշխատավարձով։
«ՄԼ Մայնինգ» ՍՊ ընկերությունը հանդիսանում է խոշոր հանքարդյունաբերական և կառուցապատող ընկերություն։ Ընկերության 100 տոկոս բաժնետերը Դավիթ Սուքիասյանն է։ Իրավական անձանց պետական ռեգիստրի կայքում երևում է, որ նրան են պատկանում «ՄԼ Մայնինգ Կոնցեռն», «ՄԼ Մայնինգ Գրուպ», «ՄԼ Մայնինգ Քոնսթրաքշն», «ՄԼ-Մայնինգ» ընկերությունները: Նախորդ տարի գործադիրը հաստատել էր մեկ այլ նախագիծ, որով ընկերությունը իրականացրել է հանրային ծառայողներին բնակարանով ապահովելու ծրագիրը:
Մեր հարցմանն ի պատասխան՝ ընկերությունից հայտնեցին, որ առաջիկայում ընկերությունը պատրաստվում է իրականացնել նաև «Քանաքեռ բնակելի համալիր» բնակելի թաղամասի շինարարությունը։ Սա բացառիկ հնարավորություն է գնել բնակարան Երևանում՝ քառակուսի մետրն ընդամենը $650 արժեքով, և ընկերությունը պատրաստակամություն է հայտնել նաև մասնակցել զինծառայողների ու պաշտպանության նախարարության աշխատակիցների համար պետական աջակցության ծրագրի շրջանակներում բնակարանների ձեռքբերման գործընթացին։
Ընկերության գլխավոր տնօրեն Էդուարդ Մարգարյանը «Առաջին լրատվական»-ի հետ զրույցում ասաց, որ ընկերությունը հաջողությամբ իրականացնում է մի շարք սոցիալական կառուցապատման ծրագրեր։ Այժմ Երևանում աննախադեպ ծավալի սոցիալական ծրագիր է նախատեսվում իրականացնել Մալաթիա-Սեբաստիա վարչական շրջանում, որով նախատեսվում է մոտ 200 մլն. դոլարի ներդրում և մոտ 500000 ք/մ կառուցապատում, թվով մոտ 7000 բնակարաններ, որոնք իրենց աննախադեպ գնով հասանելի կլինեն բոլորին: