ԵԱՀԿ Մինսկի խմբի ամերիկացի նախկին համանախագահ Ռիչարդ Հոգլանդը ուշագրավ բացահայտումներ է արել ԵԱՀԿ Մինսկի խմբի գործունեությունից։ Հատկապես հետաքրքիր բացահայտում է արել Լավրովի պլանի մասին։ Հոգլանդը նշել է, որ երբ հրապարակվեց Լավրովի պլանը, նա ռուսաստանցի համանախագահ Պոպովին հարցրել է, որ եթե Հայաստանն ու Ադրբեջանը համաձայնեն այս պլանին, ապա Կրեմլն այն կիրագործի՞, որին Պոպովը պատասխանել է, որ ոչ։
Ինչո՞ւ Ռուսաստանը չէր իրագործելու Լավրովյան պլանը․ «Առաջին լրատվական»-ի հարցին արտակարգ և լիազոր դեսպան, Արցախի նախկին արտգործնախարար Արման Մելիքյանը պատասխանեց․ «Նախ ասեմ, որ Լավրովյան պլանը չի հրապարակվել՝ համենայնդեպս, ես գրավոր տեքստ չեմ տեսել։ Բայց որպես Լավրովյան պլան ներկայացվում էր այն մոտեցումը, որը շրջանառության մեջ դրվեց ռուսաստանյան փորձագետների և քաղաքական շրջանակների կողմից Ապրիլյան պատերազմից հետո, որով հայկական կողմը համաձայնում էր տարածքներ հանձնել Ադրբեջանին, դրա դիմաց շփման գծում առավել անվտանգ և խաղաղ իրավիճակ ստանալու համար։
Այն, որ Ռուսաստանը տարածաշրջանում սեփական շահերն ունի, կարծում եմ՝ Հոգլանդի համար նորություն չէր։ Այդպես էր ԽՍՀՄ փլուզումից հետո։ Տարածաշրջանում իրենց շահերն ունեն նաև այլ պետություններ։ Ես կարծում եմ, որ Միացյալ Նահանգների համար ևս Հարավային Կովկասի ճակատագիրն անտարբերության առարկա չէ՝ նրանք ևս այստեղ ակտիվ դերակատարում ունեն։ Ուստի, ռուսաստանյան և ամերիկյան դիվանագետների տեղեկատվական փոխանակումներն ու տեսակետները դրանցից որևէ մեկի համար հիմք չեն կարող դառնալ ու լինել։ Այսինքն՝ եթե ռուսաստանցի համանախագահն ասում էր, որ Լավրովյան պլանը չէր կիրառվելու, դա ամենևին չի նշանակում, որ չէր կիրառվելու, և, մեծ հաշվով, պատերազմական եղանակով այդ պլանի դրույթների առնվազն մի մասն իրականություն դարձավ»։
Մանրամասները՝ տեսանյութում։