«Առաջին լրատվական»-ի հարցերին պատասխանել է Արցախի ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահ Սեյրան Հայրապետյանը:
– Կարմիր Շուկայի վերաբերյալ անընդհատ խոսակցություններ են շրջանառվում, որ հնարավոր է՝ 30 գերիների վերադարձի դիմաց այն հանձնվի Ադրբեջանին: Ձեզ ի՞նչ է հայտնի այդ առումով:
– Ես չճշտված տեղեկությունների վերաբերյալ չեմ ուզում մեկնաբանություններ տալ: Բացի դրանից, և՛ գերիների, և՛ անհետ կորածների, և՛ Կարմիր Շուկայի ու մնացած այդպիսի զգայուն հարցերի վերաբերյալ պետք է շատ զգույշ խոսել: Չճշտված տեղեկության վերաբերյալ ի՞նչ կարծիք պետք է հայտնեմ: Իմ կարծիքը բոլորդ էլ գիտեք, բայց այս պահին եթե չկա պաշտոնական ինֆորմացիա, «մեր տեղեկություններով» լուրերին չեմ ուզում անդրադառնալ:
– Ադրբեջանական լրատվամիջոցները նորից սկսել են տեղեկատվություն տարածել «Իսկանդերի» կիրառման հետ կապված, բեկորներ են գտել և ցուցադրում են: Դուք մասնակցել եք պատերազմին, ի՞նչ էձեզ հայտնի, ի վերջո, գործարկվե՞լ է «Իսկանդերը», թե՞ ոչ:
– Ես այդ հարցին մեկնաբանություն նույնպես չեմ տալու, հետագայում ավելի կոնկրետ կխոսենք դրա վերաբերյալ: Հասկանալի է, որ ադրբեջանական լրատվամիջոցները ի նպաստ հայկական պետականության չեն գործում: Եթե իրենց պետք է, ապատեղեկատվություն են տարածում, որոնք քաղաքական շահարկումների տեղիք են տալիս:
– Հիմա խոսվում է Արցախում աննախադեպ բնակարանաշինության մեկնարկի մասին: Մյուս կողմից՝ քննադատություններ են հնչում, թե այդքան շենքեր կառուցելու փոխարեն բանակը վերազինեք, թե բնակարանաշինության անվան տակ շատ հաճախ փողերի լվացում է տեղի ունենում: Ձեր կարծիքով՝ ո՞րն է առաջնային, և բանակը վերազինելու ուղղությամբ ի՞նչ քայլեր պետք է արվեն, որ չեն արվում:
– Մենք միանշանակ բանակը վերազինելու ենք, դա առաջնային խնդիր է: Փողերի լվացում թույլ չտալու համար գոյություն ունեն պետական ինստիտուտներ, հասարակությունն այսօր բաց է, Արցախի Հանրապետությունը, ցավոք, այսօր այնքան է փոքրացել, որ արդեն բոլորը բոլորին դեմքով գիտեն: Ոչ թե մենք դա թույլ չենք տալու, այլ անբարոյականություն կլինի, եթե ինչ-որ մեկը շարունակի փողեր լվանալ և այլն: Բանակի վերազինումը կապել բնակարանաշինության հետ նույնպես ճիշտ չէ: Դրանք զուգահեռ պետք է ընթանան՝ առաջնահերթություններ տալով: Իսկ այդ քննադատողներին, որ ասում են՝ բնակարան պետք չի, խորհուրդ կտամ իրենց բնակարանը տան այն մարդուն, որը այսօր բնակվում է անմխիթար վիճակում կամ տեղահանված է: Թող իրենք գան այդ պայմաններում ապրեն ու այլևս այդպիսի քննադատություններ չանեն: Պետությունը պարտավոր է լուծել իր քաղաքացիների սոցիալական, կենցաղային պայմանների ապահովման հարցը: Ինչ վերաբերում է բանակաշինությանը, ապա չեմ ուզում շատ փակագծեր բացել, բայց մենք դատապարտված ենք ունենալու հզոր բանակ: Այո, մեր ժողովուրդը պատրաստ է ինչ-որ մի բան պակաս հագնի, պակաս ուտի, բայց բանակը լինի ամուր, պետականությունը լինի հզոր, չունենանք զոհեր, ինչպես ունեցանք այս վերջին պատերազմում: Բայց նաև պետք է մեր իշխանությունները, այն մարդիկ, որոնք երկար տարիներ պաշտոններ են զբաղեցրել, պաշտոններին զուգահեռ բիզնեսներով են զբաղվել, իրենք էլ պետք է պատրաստ լինեն: Ամեն ինչ չէ, որ պետք է ասենք՝ ժողովուրդը պատրաստ է: Բա էդ մարդիկ ինչի՞ են պատրաստ, ու եթե պատրաստ չեն, բոլորս համախմբված պետք է պարտադրենք այդ մարդկանց: Իրականում ամեն բան այդքան հեշտ չի, որքան ներկայացնում են քննադատողները: Ես համաձայն եմ առողջ քննադատությանը, դա կարևոր է, բայց պառկել բազմոցին ու քննադատել բոլորին՝ ես դա չեմ ընդունում:
