Կալիֆոռնիայում և Նեվադայում արջերը տառապում են անհայտ նյարդաբանական հիվանդությունից, որը նրանց դարձնում է մարդկանց համար ընկերասեր, բայց անդառնալի վնաս է հասցնում նրանց առողջությանը: Հայտնում են Կալիֆոռնիայի վայրի բնության վարչությունից:
Հիվանդության մասին առաջին զեկույցները հայտնվել են 2014-ին և դեռ շարունակվում են. վերջին 12 ամիսվա ընթացքում առնվազն չորս դեպք է գրանցվել Կալիֆոռնիայում: Ախտանիշներն են՝ թուլություն, քաշի կորուստ, գլխի դող ու կողքի թեքում և մարդկանց հանդեպ ընկերասիրություն, որը մասնագետները համեմատում են շան հետ: Այսպես, օրինակ, 2019-ին արջի քոթոթը մոտեցավ սնոուբորդիստին և տեղավորվեց նրա կողքին, իսկ 2020-ի աշնանը մի արջ, որին մարդիկ ուտելիք էին տվել, հանգիստ բարձրացավ նրանց մեքենայի բեռնախցիկը:
Հետազոտությունը ցույց տվեց, որ արջերը տառապում են էնցեֆալիտից: Նրանց մեծ մասը անկել է, կամ առողջական նկատառումներով ստիպված են եղել քնեցնել։ Էնցեֆալիտը կարող է առաջանալ տարբեր պատճառներով, ներառյալ վիրուսային վարակները, բայց մասնագետները պատճառը դեռ չեն կարողացել պարզել: Անհայտ է նաև, վարակի՞չ է արդյոք այս հիվանդությունը և որքանո՞վ է վտանգավոր մարդու կամ այլ կենդանիների համար:
Այնուամենայնիվ, չնայած այս դեպքերին, սև արջերի պոպուլյացիան բավական առողջ է թվում: Մասնագետները խորհուրդ են տալիս մարդկանց չշփվել արջերի հետ, որքան էլ նրանք ընկերական թվան. այդ հանդիպումները կարող են ավելի վտանգավոր լինել կենդանիների, քան մարդու համար:
