Հայտարարվել է արտահերթ ընտրությունները համամասնական ընտրակարգով անցկացնելու մասին: «Այն ինչ խոստացել էր «Իմ քայլը» և Նիկոլ Փաշինյանն էլ ճանապարհային քարտեզում նշել էր, այսինքն՝ նախատեսվում էր Ընտրական օրենսգրքի ընդհանուր բարեփոխում, բայց դա բնավ չկատարվեց, և իրականություն չդարձավ ԸՕ փոփոխությունների մեծ փաթեթ ներառող նախագիծը, որի քննարկմանը նաև «Ժառանգությունն» է մասնակցել, և որն ուղարկվել է նաև Վենետիկի հանձնաժողով:
Խնդիրը միայն ռեյտինգային ընտրակարգը չէր: Անշուշտ, այդ ընտրակարգը հանգեցնում էր քաղաքական կոռուպցիայի, բայց այս ԸՕ-ն բազմաթիվ այլ թերություններ ևս ունի, և անհրաժեշտ էր շատ բան փոխել խաղի կանոններում: «Առաջին լրատվական»-ի հետ քննարկմանն այս մասին նշեց «Ժառանգություն» կուսակցության վարչության նախագահ Նարինե Դիլբարյանը:
«Քաղաքացու որոշում» կուսակցության ԳՄ անդամ Գարեգին Միսկարյանը կարևորեց ռեյտինգային ընտրակարգի վերացումը և համամասնական ընտրակարգին անցնելը: Նա նաև հույս հայտնեց, որ իշխող ուժը բավարար քաղաքական կամք կդրսևորի և հիմնական փաթեթի գոնե ամենակարևոր դրույթների փոփոխությունները կընդունի մինչև արտահերթ ընտրությունների անցկացումը:
«Հայ կառուցողական կուսակցության» ղեկավար Անդրիաս Ղուկասյանը հավելեց, որ ընտրությունները տեղի կունենան համամասնական փակ ցուցակներով, և այս ընտրությունները լինելու են շատ նման նախագահական ընտրություններին: «Այս ընտրակարգով առաջնորդներն են մրցակցելու, և փակ համամասնական ցուցակների առանձնահատկությունը նվազեցնելու է պատգամավորների դերակատարությունն ընտրություններում»,- նկատեց Ղուկասյանը:
Մանրամասն՝ տեսանյութում:
