Մոսկվան վրդովված է Թբիլիսիի կենտրոնում կանգնեցված ռուս գրող և դիվանագետ Ալեքսանդր Գրիբոյեդովի հուշարձանի նկատմամբ կատարված վանդալիզմից: Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի հայտարարության մեջ:
Վլադիմիր Պոզներին ուղղված անպարկեշտ մակագրություն և «Ռուսաստանը չարիք է» բառերը հուշարձանի վրա հայտնվեցին հեռուստալրագրողի՝ Վրաստան ժամանելու դեմ տարերային ցույցից անմիջապես հետո: Մի քանի ժամ անց գրածը մաքրեց Թբիլիսիի քաղաքային ժողովի անդամ Էրեկլե Կուխիանիձեն:
«Ինչպիսին էլ որ լինեն վանդալիզմի հեղինակների դրդապատճառները, դրան արդարացում չկա: Քաղաքակիրթ հասարակության մեջ նման արարքը տարակուսանք և նողկանք է առաջացնում: Նման գործողություններն առավել անընդունելի են, եթե հաշվի առնենք Ա.Ս. Գրիբոյեդովի անձի կարևորությունն ու նշանակությունը ինչպես Ռուսաստանի, այնպես էլ Վրաստանի պատմության համար: Համոզված ենք, որ մեր երկրների քաղաքացիների մեծ մասը համերաշխ է`գնահատելու նրա ներդրումը Ռուսաստանի և Վրաստանի ժողովուրդների միջև կապերի ամրապնդման գործում»,- ասաց Զախարովան: