Այսօր լրանում է Ապրիլյան քառօրյա պատերազմի հինգերորդ տարելիցը։ Մինչև 44-օրյա պատերազմը Հայաստանում վիճում էին՝ Ապրիլյան քառօրյան հաղթանա՞կ էր, թե՞ պարտություն։
Ինչպիսի՞ն են ձեր մոտեցումները․ «Առաջին լրատվական»-ի հարցին վերլուծաբան Գոռ Մադոյանը պատասխանեց․ «Եթե Ապրիլյան քառօրյան առանձին չդատենք, այլ ընդհանուր համատեքստում, ապա այն հետաձգված ողբերգություն էր։ Այդ առումով մենք դասեր չքաղեցինք Ապրիլյան քառօրյա պատերազմից և, ցավոք, այն հետագիծը, որ մենք տեսանք Ապրիլյան քառօրյայի ժամանակ, դա միայն նախերգանքն էր մեծ պատերազմի»։
Այսօր ՀՀ Զինված ուժերի Գլխավոր շտաբի պետ Արտակ Դավթյանը Եռաբլուրում լրագրողների հետ ճեպազրույցի ժամանակ ասել է, որ 44-օրյա պատերազմն այլ ելք կունենար, եթե մենք դասեր չքաղեինք Ապրիլյան քառօրյա պատերազմից։ Ի՞նչ նկատի ունի Արտակ Դավթյանը․ «Առաջին լրատվական»-ի հարցին Գոռ Մադոյանը պատասխանեց․ «Արտակ Դավթյանը հավանաբար նկատի ունի այն, որ Արցախի լիակատար կորուստ, ըստ էության, տեղի չի ունեցել։ Չգիտեմ՝ ինչ տրամաբանությամբ է նա ասել, բայց կարծում եմ, որ 44-օրյա պատերազմի ժամանակ Հայոց բանակը, ըստ էության, կարողացավ դիմադրել ամեն ինչով գերազանցող եռակողմ թշնամուն։ Բայց այն, որ 2016 թվականից մեր ռազմաքաղաքական ղեկավարությունը հասկանում էր, որ դա հետաձգված պատերազմ էր, դա փաստ է։ Շատ ռազմական փորձագետներ այս կամ այն կերպ ասում էին, որ Ապրիլյան քառօրյան հետախուզական պատերազմ էր հայկական ուժերի պոտենցիալը հասկանալու համար»։
