«Առաջին լրատվական»-ի հարցերին պատասխանում է Արցախի նախագահի հատուկ հանձնարարությունների գծով ներկայացուցիչ Վահան Բադասյանը։
– Հայաստանի և Արցախի ղեկավարները համատեղ խորհրդակցություն են անցկացրել, որի ժամանակ նշվել է, որ Արցախում մեծ ծավալի բնակարանաշինության գործընթաց է սկսվում: Ձեր կարծիքով՝ դա որքանո՞վ կհոգա արցախցիների կարիքները, որքանո՞վ այդ գործընթացը թափանցիկ կլինի, գումարներ չեն մսխվի:
– Այո՛, գործընթացը լինելու է թափանցիկ, բայց որևէ մեկը չի կարող կասկածել դրա՝ նպատակային օգտագործման վերաբերյալ: Իհարկե, լինելու են մարդիկ, որոնք թերահավատ են լինելու, չեն հավատալու և չեն ուզենալու հավատալ: Լինելու են մարդիկ, որ ասելու են՝ կերան, թալանեցին, բայց մենք պետք է այնպես անենք, որ առավելագույն թափանցիկության միջոցով կարողանանք պահպանել արդարությունը, և ժողովուրդն իմանա, որ ամեն ինչ արդար է արվում, չեն մսխվում, չեն թալանվում գումարներ: Մենք դրա հնարավորությունն ունենք, դրան հասնելու ձևը գիտենք, ինչպես անել, որ թափանցիկ ու արդար լինի: Ժամանակը դա ցույց կտա: Ինչ վերաբերում է նրան, թե բնակարանաշինությունն ինչ արդյունք կտա, իհարկե, ոչ միայն բնակարանային շինարարությունը, այլ ամեն ինչն է կարևոր: Այսինքն՝ անվտանգության տեսանկյունից միջոցառումներ կան այստեղ անելու, պաշտպանության տեսակետից քայլեր կան կատարելու, որպեսզի մարդիկ իմանան, որ պաշտպանված են, անվտանգ են: Միայն բառերով չէ, որ ասենք՝ անվտանգ է, այլ գործով դա պետք է ցույց տանք, և մարդը պետք է իր աչքով դա տեսնի: Բնակարանաշինություն, անվտանգություն, սոցիալական բարեկեցություն ապահովել պետք է, հետևաբար, պետք է զարգացնենք տնտեսությունը, դրա համար պետք է ոռոգման համակարգ, նոր հողերի յուրացում: Հիմա մենք արդեն չունենք հարթավայրային մաս, նախալեռնային ու լեռնային է: Այս տեսանկյունից մենք շատ անելիքներ ունենք: Պատերազմը մեզ դրեց լուրջ խնդիրների առջև, մենք Արցախը կորցնելու վրա ենք, բայց չպետք է կորցնենք: Մենք պետք է պարտավորություն ստանձնենք Արցախը պահպանել որպես հայկական, լծվենք այդ աշխատանքին և ամեն ինչ անենք, որ իմ նշած միջոցառումները կատարենք, որ արցախցին իրեն ապահով զգա:
– Տեսակետ կա, որ բնակարանաշինությունից առաջ, նախ, պետք է բանակը շտապ հզորացնել, որ եղածն էլ չկորցնենք: Դուք կիսո՞ւմ եք այս մոտեցումը:
– Իհարկե, այս գործերին մենք պետք է առաջնահերթություն տանք և հերթով կատարենք: Իհարկե, առաջին տեղում անվտանգությունն է, հետո նոր միայն մտածենք մեր գլխավերևում տանիք ունենալու, տուն ու բնակարան ունենալու մասին: Պետք է նաև տնտեսություն ունենանք, որ զարգանանք: Այսինքն՝ հերթականությամբ ամեն բան պետք է անենք, հերթականությամբ, բայց գրեթե միաժամանակ:
– Վերջին օրերին քննադատություններ են հնչում, թե ինչ կարիք կա, որ Արցախի նախագահը 40 խորհրդական ունենա, որ Արցախի իշխանությունները ծախսերը ռացիոնալ չեն իրականացնում: Դուք ինչպե՞ս եք վերաբերում այս քննադատություններին:
– Ես կարող եմ պատասխան տալ միայն իմ մասով, որ իմ անելիքները բավական մեծ են, ծանր են, իմ աշխատանքներն ավելին են, քան այդ քննադատողները պատկերացնում են: Իսկ մնացած հարցերը հերթով կամաց-կամաց կանենք: Այդպիսի հայտարարություններ անող մարդիկ գործին օգուտ չեն տալիս, ընդհակառակը, նրանց արածը մի տեսակ ապատեղեկատվության նման մի բան է, կարելի է բնութագրել անգամ որպես բամբասանք: Նման բաներ չաշխատող և աշխատանքից անտեղյակ, բամբասող մարդիկ են ասում:
– Հայտնի է ձեր քննադատական վերաբերմունքը ՀՀ իշխանությունների նկատմամբ, սակայն Արցախի իշխանությունները համագործակցաբար աշխատում են ՀՀ իշխանությունների հետ: Դուք այստեղ խնդիր տեսնո՞ւմ եք, թե՞ ոչ:
– Այո՛, Արցախի իշխանությունները նորմալ, լավ աշխատում են, իսկ Հայաստանում իշխանությունները խճճված են, այնտեղ խոր ճգնաժամ է, մինչդեռ Արցախում այդ ճգնաժամը չկա: