«Նախընտրական քարոզարշավը սկսված է, բայց բովանդակային քննարկումներ դեռ չկան: Կա թյուր կարծիք, թե միայն քաղաքական ուժերը պետք է պատրաստվեն ընտրություններին, բայց պետք է պատրաստվի նաև հասարակությունը՝ ճիշտ հարցեր բարձրաձայնելով: Բովանդակային քննարկումը պետք է պարտադրի հասարակությունը»,- այս մասին «Առաջին լրատվական»-ի հետ զրույցում նշեց Երևանի պետական տիկնիկային թատրոնի գեղարվեստական ղեկավար Ռուբեն Բաբայանը:
«Ես 30 տարվա ընթացքում որևէ քաղաքական ուժից չլսեցի հասկանալի մոտեցում մշակութային քաղաքականության վերաբերյալ: Քաղաքական գործիչները պետք է ներգրավեն մասնագետների, որպեսզի երկիրը դառնա մրցակցային և ապահովվի առաջընթաց»,- նշեց Բաբայանը:
Մեր զրուցակցի կարծիքով՝ բոլոր նրանք, ովքեր հավակնում են մուտք գործել ԱԺ, պետք է նախ պատասխանեն կարևորագույն հարցերին՝ ինչպե՞ս պետք է վերականգնել Հայաստանի ինքնիշխանությունը և ինչպիսի՞ քաղաքակրթական, ի՞նչ դաշնակցային համակարգում են տեսնում մեր երկիրը, ի՞նչ արժեքային համակարգ է որդեգրելու պետությունը: բաբայանի խոսքով՝ ճանապարհները կարող են տարբեր լինել, բայց նպատակը պետք է լինի մեկը՝ ամրապնդել հայոց պետականությունը, եթե նպատակը դա չէ, ապա այդ քաղաքական ուժերը գործում են ՀՀ Սահմանադրության դեմ:
Անդրադառնալով քաղաքական գործիչների՝ միմյանց «թուրք» անվանելով վարկաբեկելուն, Բաբայանը նշեց. «Այսօր այնքան են իրար մեղադրում, ասելով՝ սա թուրք է, որ տպավորություն է ստեղծվում, թե Հայաստանում հայ չի մնացել: Այդ մեղադրանքների հիմքում ընկած է քսենոֆոբիան՝ այլատյացությունը, իսկ դրա արմատներից մեկը վախն է՝ ֆոբիան… Լավ հայը ամեն րոպե չի գոռում՝ ես հայ եմ, լավ հայը կառուցում է իր պետությունը»:
Մանրամասները՝ տեսանյութում:
