Առաջիկայում ականատես կլինենք հինգերորդ սերնդի քարոզարշավի և տեղեկատվական քաոսի. կտեսնենք, թե ինչպիսի ականներ կպայթեն ինֆորմացիոն դաշտում, մանիպուլյացիաներ կլինեն: «Առաջին լրատվական»-ի հետ զրույցում, անդրադառնալով այս դիտարկմանը, «Հրանտ Մաթևոսյան» հիմնադրամի տնօրեն, կինոռեժիսոր Դավիթ Մաթևոսյանը նշեց, որ, ըստ էության, ամեն ինչ արդեն սկսվել է. «Ուղղակի ուժգնությունը և ֆինանսական միջոցների ներդրումն այդ ականների ստեղծման և պայթեցման համար պահվել են «համով» ժամանակներում տեղի ունենալու համար: Ես նախընտրական քարոզարշավից ոչինչ չեմ ակնկալում, բացի կոմպրոմատները, պայթյունները, և ստեղծված իրավիճակի էլ ավելի ողբերգական դառնալը, որովհետև ես ոչ մի ծրագիր չեմ տեսնում»:
«Այն ուղերձը, որ ուղղել եմ մեր քաղաքական ամուլ դաշտին, շարունակում եմ ուղղել. ձեզանից ո՞ր մեկն է բացառում և ո՞ր մեկն է կարողանալու կասեցնել Զանգեզուրին սպառնացող վտանգը, սահմանների վտանգը, երբ մեր գյուղացիներն ու համայնքների ներկայացուցիչները ադրբեջանական զորքի հետ երես առ երես են, կամ ձեզանից ո՞ր մեկն է կարողանալու այնպես անել, որ Շուշիից Հայաստան եկող ավտոմեքենաները չքարկոծվեն: Սրանք պարզ հարցեր են, որոնց պատասխան չեն տալիս ո՛չ ԱԱԾ-ն, ո՛չ ՊՆ, հակառակը՝ տգետ ուղերձներ են շրջանառում հանրության մեջ:
Որ քաղաքական ուժը կկարողանա այդ հարցերին լուծում տալ, նա էլ լինելու է այս ժողովրդի հերոսը, լինելու է ապագա քաղաքական լիդերը: Ոչ մեկից ես այդպիսի ուղերձ չեմ տեսնում»,- նշեց Մաթևոսյանը՝ հավելելով, որ բոլոր քաղաքական ուժերից միայն փոխադարձ վարկաբեկումներ են հնչում:
«Կեղծ օրակարգ է պարտադրվել մեզ, և ժամանակ առ ժամանակ մեզ դրսից ներկայացնում են, որ Հայաստանում ոչ մեկը չկա, որ հետը խոսենք՝ որպես քաղաքական միավոր, բայց ես համոզված եմ, որ կան մարդիկ, ում հետ կարելի է խոսել, բայց հատուկ կազմակերպված է, որ քաղաքական դաշտը լինի այսպիսին. մեր քաղաքական ուժերը ուրիշի խամաճիկներ են, ոչ թե այս երկրի գործիչներ»:
Մաթևոսյանի դիտարկմամբ՝ քաղաքականությամբ զբաղվելը Հայաստանում դարձել է բիզնես ու փեշակ:
Մանրամասն՝ տեսանյութում:
