«Առաջին լրատվական»-ի հարցերին պատասխանել է ԱԺ ԲՀԿ խմբակցության պատգամավոր Արտյոմ Ծառուկյանը:
– Պարոն Ծառուկյան, նախկին վարչապետ Հրանտ Բագրատյանը հայտարարել է, որ դավաճանություն է համարում այն ուժերի քայլը, որոնք և՛ պայքարում են Նիկոլ Փաշինյանի հեռացման համար, և՛ զուգահեռ քննարկում են հավանական ընտրություններին մասնակցության հարցը: Սա, ըստ էության, նաև ԲՀԿ-ին ուղղված մեղադրանք է: Կարո՞ղ ենք ասել, որ 17-ի ֆորմատը փլուզվել է:
– 17 ուժերի ֆորմատը պահպանված է, մենք ունեինք ընդհանուր համաձայնություն ամենակարևոր հարցի շուրջ՝ դա վարչապետի հեռացման հարցն է: Այդ հարցն օրակարգից չի հանվել, և 17 քաղաքական ուժերը գրանցել են հաջողություն այնքանով, որ վարչապետին պարտադրել են գնալ արտահերթ ընտրությունների: Ես չեմ կարծում, որ մենք 17 ուժերի օրակարգում առկա որևէ պայմանավորվածություն կամ որևէ այլ բան խախտել ենք: Ընդհակառակը՝ մենք, ինչպես ասում են, տեղը տեղին, մեր բոլոր գործողություններում եղել ենք բաց, պարզ, շիտակ, թափանցիկ: Հետևաբար մեր մասով չէ պարոն Բագրատյանի հայտարարությունը:
– Սակայն ԲՀԿ-ն և Վանեցյանի «Հայրենիք» կուսակցությունն էին ավելի վաղ հայտարարել, որ մասնակցելու են արտահերթ ընտրություններին: Դուք այս փուլում ճանապարհ տեսնո՞ւմ եք 17 ուժերի շրջանակում:
– Մենք ասել ենք ամենակարևոր բանը, որ դեմ ենք արյունահեղությանը և ուզում ենք, որ բոլոր քաղաքական գործընթացներն ընթանան սահմանադրական ճանապարհով: Քանի դեռ սահմանադրական ճանապարհով վարչապետի հեռացման մեխանիզմները վերացած չեն, անիմաստ ենք համարել խոսել այլ բաներից: Մենք 17-ի ֆորմատով էլ որևէ հակաօրինական գործողություն երբեք չենք արել: Մենք օգտվել ենք օրենքով մեզ տրված հնարավորություններից՝ հանրահավաք, ցույց, երթ, անհնազանդության ակցիաներ և այլն: Դրանք բոլորը օրենքի շրջանակում են եղել, և այն հաջողությունը, որ մենք գրանցել ենք, որ պարտադրել ենք գնալ արտահերթ ընտրությունների, կարծում եմ՝ շատ դրական է: ԲՀԿ-ն արդեն հայտարարել է, որ ընտրություններին գնալու է առանձին, և մենք այս պահին պատրաստվում ենք արդեն ընտրական գործընթացներին, ակտիվորեն մասնակցելու ենք ընտրություններին և փորձելու ենք ստանալ ժողովրդի վստահության քվեն:
– 17 ուժերից ոմանք հայտարարում են, որ իշխանությունների հետ բանակցելու որևէ բան չունեն, ուզում են, որ հեռանան, արտահերթ ընտրությունների մասին խոսք չկա:
– Արտահերթ ընտրությունները հենց վարչապետի օրինական հեռացման ճանապարհն են:
– Բայց 17 ուժերը պահանջում էին, որ նախ վարչապետը հեռանա, ժամանակավոր կառավարություն ձևավորվի, որից մեկ տարի հետո միայն լինեն արտահերթ ընտրություններ:
– 17 քաղաքական ուժերից ոչ մեկը երբևէ հակաօրինական գործողությունների կոչ չի արել: Անիմաստ է խոսել դրա մասին, քանի դեռ սպառված չեն սահմանադրական ճանապարհով վարչապետի հեռացման հնարավոր մեխանիզմները:
– Ի՞նչ ակնկալիքներ ունեք արտահերթ ընտրություններից, կրկին հավակնելու եք խորհրդարանում երկրորդ ուժը լինելու տեղի՞ն:
– Ինչո՞ւ պետք է երկրորդ տեղին հավակնենք: Ցանկացած քաղաքական ուժ հավակնություններ ունի գալ իշխանության, դառնալ իշխող քաղաքական ուժը: Բնականաբար, մենք էլ հավակնություններ ունենք, գնում ենք ընտրությունների առանձին: Մենք ունենք մեր ցուցակը գլխավորող անձին՝ Գագիկ Ծառուկյանին, և փորձելու ենք ստանալ ժողովրդի վստահության քվեն:
– ԲՀԿ-ն արդեն նախաձեռնում է մարզային այցեր: Մարզեր է այցելում նաև Նիկոլ Փաշինյանը: Դուք ո՞ր ուժին եք համարում որպես ձեր հիմնական մրցակից:
– Մեր մարզային հանդիպումները ընդհանրապես ընտրությունների հետ կապ չունեն, որովհետև մեր բակային այցերը եղել են մշտապես: Դեռ ընտրությունների մասին խոսք չի եղել, բայց մեր մարզային այցերը տարիներ շարունակ եղել են: Նաև խորհրդարանական խմբակցությունը մարզային այցեր է ունեցել: Այդ այցերը պատշաճ կարգով լուսաբանվել են, հանրությունը տեսել է, տեղյակ է, ուղղակի հիմա, քանի որ բոլորս գիտենք, որ դիմացն ընտրություններ են, ինչ-որ տեղ դա փորձում են կապել ընտրությունների հետ: Մարզային այցերը ընտրությունների հետ կապված կլինեն հունիսի 7-ից հետո, երբ քարոզարշավը մեկնարկի: Արդեն քարոզարշավի շրջանակներում մենք մեր նախընտրական քարոզը կիրականացնենք մեր նախանշած ֆորմատով: Ինչ վերաբերում է մրցակիցներին, բոլոր ուժերը, որոնք կմասնակցեն ընտրություններին, բոլորն էլ մրցակից են, բոլորին էլ մենք լուրջ ենք վերաբերվում: Ամենակարևորը՝ ընտրությունները և նախընտրական այս փուլերը մենք պետք է անցնենք այնպես, որ մաքսիմալ առանց իրար վիրավորելու, առանց անձնական դաշտ մտնելու լինի: Մենք դա մեծապես կարևորում ենք հիմա, որ այդ ամենը քաղաքակիրթ ընթանա, և ում ժողովուրդը վստահի, այդ ուժն էլ թող ԱԺ-ում իր ներկայացվածության աստիճանն ունենա:
Լուսանկարը՝ panorama.am-ի