«ԵԱՀԿ Մինսկի խմբի համանախագահության արդյունավետության խնդիր կա: Դա նկատելի է եղել տարիներ շարունակ: Օրինակ՝ համանախագահության կազմակերպած հանդիպումների ժամանակ Ալիևը մի բան էր ասում, վերադառնում էր Բաքու և լրիվ այլ բան էր անում ու ասում, ինչը անարձագանք էր մնում համանախագահների կողմից: Այսինքն՝ համանախագահները Ադրբեջանի սադրանքները, 2016-ի պատերազմը չօգտագործեցին Ադրբեջանին զսպելու, սանձելու համար: Արդյունքում տարիների ընթացքում Ադրբեջանի հռետորաբանությունը զարգացավ, և այսօր արդեն Հայաստանի տարածքների նկատմամբ հավակնություններ են ներկայացվում Ադրբեջանի նախագահի կողմից»,- «Առաջին լրատվական»-ի հետ զրույցում ասաց «Օրբելի» կենտրոնի փորձագետ Նարեկ Մինասյանը՝ անդրադառնալով ԱԳ նախարար Արա Այվազյանի վերջին հայտարարություններին:
Մեր զրուցակցի խոսքով՝ Ադրբեջանը խախտեց նաև սկզբունքների սկզբունքը, որ ընկած էր կարգավոման գործընթացի հիմքում, այն է՝ ուժի չկիրառման սկզբունքը. «Այդ սկզբունքի խախտումը բավական լուրջ ապտակ էր նաև համանախագահության ինստիտուտին: Համանախագահությունը տարիների ընթացքում դասեր չքաղեց ստեղծված իրավիճակից և փորձում էր իներցիայի ուժով պահպանել նաև իր գործունեությունը: Մինչդեռ համանախագահներն ունեին բավարար հեղինակություն և բավարար լծակներ, որպեսզի հնարավորինս զսպեին պաշտոնական Բաքվին: Իսկ թե ինչու նրանք չօգտագործեցին իրենց լծակները՝ այստեղ մեծ հարցական նշան դնենք»:
Փորձագետը նկատեց նաև՝ այսօր, սակայն, կարծես նույն համանախագահները այնքան էլ համամիտ չեն Ալիևի հետ և չեն կարծում, թե ԼՂ հարցը փակված է. «Ալիևը ստիպված է հաշվի նստել նույն համանախագահության հետ: Եվ պատահական չէ, որ այսօր Երևանից հնչում են մեսիջներ առ այն, որ կարիք կա առավել ուժեղ համանախագահության»:
Առավել մանրամասն՝ տեսանյութում:
