Շուրջ մեկ տարի է աշխարհն անցնում է կորոնավիրուսի արհավիրքով, այժմ նույն մարտահրավերն է՝ նոր հնարավորություններով: Այս մասին «Առաջին լրատվական»-ի հետ զրույցում նշեց ԵՊԲՀ ռեկտոր Արմեն Մուրադյանը՝ հավելելով, որ երբ արձանագրվեց պատվաստանյութի առկայությունը, մեկնարկեց նոր փուլ:
«Պատվաստվելը կարող է դառնալ այս արհավիրքի լավագույն հաղթահարումներից մեկը»,- նշեց Մուրադյանը: -Իմունիզացիայի երկու տարբերակ ունենք. առաջինը՝ բնականոն ընթացքով հիվանդանալն է, երբ բնակչության հիվանդացության թիվը 70 տոկոսի շեմը հատի, կարող ենք խոսել կոլեկտիվ իմունիտետից, սա դաժան ճանապարհ է: Ըստ պաշտոնական վիճակագրության՝ Հայաստանում 200 հազար մարդ է հիվանդացել կորոնավիրուսով, բայց կարծում եմ, թվեր կան, որոնց դեռ չենք տիրապետում, նկատի ունեմ անախտանիշ դեպքերը, երբ մարդիկ հիվանդացել են առանց ախտանիշների, բայց նրանց մոտ ձևավորվել է իմունիտետ: Այսինքն՝ 70 տոկոսը լրացնելը նշանակում է, որ 2 միլիոն հիվանդացություն պետք է ունենանք երկրում, և 2 տոկոսի դեպքում չի հաջողվում կյանքը փրկել, իսկ դա նշանակում է 40 հազար մարդու մահացություն, ինչը մեզ համար անընդունելի է: Սա բնական ընտրանու ճանապարհն է, որը կարող էր ընդունելի լինել մինչև հակաբիոտիկների և մինչև պատվաստանյութերի դարաշրջանը, բայց այսօր պետք է ընտրել իմունիզացիայի երկրորդ ճանապարհը, սա քաղաքակրթության ձեռքբերումն է: Դեռևս հայտնի չէ, թե այս պատվաստանյութը որքան ժամանակ կապահովի իմունիտետ: Պատվաստանյութի բացասական ազդեցություններն էպիզոդիկ դեպքեր են… Այս խնդրի հրատապ լուծման եղանակը պատվաստումն է»:
Նրա խոսքով՝ կորոնավիրուսով հիվանդացածը չի կարող անվտանգ համարվել շրջակա միջավայրի, մյուսների համար: «Ոչ ոք չի կարող խուսափել, բոլորը պետք է օգտվեն պատվաստանյութից»,- նշեց ԵՊԲՀ ռեկտորը:
Մանրամասն՝ տեսանյութում:
