Ռուսաստանը միջազգային ասպարեզում ավելի շատ բարեկամական հարաբերություններ ունի, քան առճակատման, հայտարարել է ՌԴ նախագահի մամուլի քարտուղար Դմիտրի Պեսկովը «Արգումենտի ի ֆակտի»-ին տված հարցազրույցում:
«Խոսելով բարեկամների մասին, հավանաբար, պետք է սկսել Չինաստանից: Այդպիսի երկիր է նաև Հնդկաստանը: Եվ ապա կարող ենք թվարկել Ասիայի և Խաղաղ օվկիանոսի տարածաշրջանի գրեթե բոլոր երկրները: Գուցե բացի Ավստրալիայից»,- ասել է Կրեմլի ներկայացուցիչը:
Նա նաև նշել է, որ Մոսկվան լավ հարաբերություններ է պահպանում գրեթե բոլոր նախկին խորհրդային պետությունների հետ, բացառությամբ Վրաստանի, Ուկրաինայի և Բալթյան երկրների:
«Մենք հիանալի հարաբերություններ ունենք ԱՊՀ հանրապետությունների հետ, խոր ինտեգրում ԵԱՏՄ երկրների հետ: Բացի այդ, նախկին Խորհրդային Միության տարածքում ինտեգրման մեկ այլ կարևոր գործընթաց է Ռուսաստանի և Բելառուսի Միութենական պետությունը»,- հավելել է Պեսկովը:
Նրա խոսքով, Ռուսաստանի հետ հարաբերությունների զարգացմամբ շահագրգռված են Լատինական Ամերիկայի և Աֆրիկայի երկրները, ինչպես նաև եվրոպական մի շարք պետություններ:
Հարցազրույցի ընթացքում Պեսկովը նաև շեշտել է, որ Ռուսաստանի իշխանությունները թույլ չեն տա Վաշինգտոնին ուժի դիրքերից երկխոսություն վարել Մոսկվայի հետ:
