Հանրային հեռուստաընկերության եթերում Անվտանգության խորհրդի քարտուղար Արմեն Գրիգորյանը խոսել է Թուրքիայի հետ հարաբերություններից։
«Անվտանգության խորհրդի քարտուղարի խոսքը երկու կոմպոնենտ ունի։ Խոսք կա, որ պետությունները չեն լինում հավերժական թշնամիներ, կամ հավերժական բարեկամներ։ Դա դարերով ապացուցված երևույթ է, բայց կոնկրետ պատմական այս էտապում, որը սկիզբ է դրվել 1915 թվականից, չենք կարող չփաստել, որ Թուրքիան մեզ համար չի կարող դիտարկվել որպես ոչ հակառակորդ պետություն՝ հաշվի առնելով Թուրքիայի ստրատեգիական նկրտումները։ Ըստ էության՝ կարող ենք փաստել, որ Թուրքիան մեզ հակառակորդ երկիր է՝ գոնե այս մասշտաբով։
Վերջին այս հարյուրամյա ցիկլը մեզ պետք է ցույց տա մի պարզ իրողություն, որ երբ մենք մեր հակառակորդ պետության հետ հարաբերություններում թույլ ենք տալիս, որ մուտք գործի երրորդ ուժ կամ երրորդ կողմ, բնականաբար, դա հանգեցնում է շատ տխուր հետևանքների։ Երրորդ կողմ նկատի ունեմ, իհարկե, Ռուսաստանի Դաշնությանը։ Գոնե այս կոնտեքստում մենք պետք է կարողանանք հարաբերվել Թուրքիայի հետ։ Ես չեմ խոսում բարեկամության մասին, որը, ըստ իս՝ պատմական այս շրջափուլում հնարավոր չէ։ Բայց ես խոսում եմ հարաբերվելու մասին, որը կարող է լինել նույնիսկ հակադրման պայմաններում»,- «Առաջին լրատվական»-ի հետ զրույցում ասաց պատմաբան Դավիթ Թինոյանը։