«ՍԴ-ն այդ որոշումն է կայացրել, բայց հանցանքը մնացել է, չէ՞»,- Մարտի 1-ի զոհերի հարազատները ընդվզում են ՍԴ որոշման դեմ և պայքարի մղումներ ունեն, բայց չգիտեն՝ ում դեմ: Այս մասին «Առաջին լրատվական»-ի հետ զրույցում նշեց իրավապաշտպան Ժաննա Ալեքսանյանը՝ անդրադառնալով Սահմանադրական դատարանի՝ Քրեական օրենսգրքի 300.1 հոդվածը հակասահմանադրական և անվավեր ճանաչելու մասին որոշմանը:
«Մարտի 1-ի զոհերի հարազատները մտածում են՝ ի՞նչ պատահեց, որ այսպես փոխվեց ամեն ինչ… Երկուսուկես տարի գնում էր դատավարությունը, և հանկարծ մտնում է դատաքննության փուլ, ու միանգամից փակվում է: Չգիտեմ, թե ինչ կլինի, որովհետև 2008-ից մինչև հիմա քաղաքական բոլոր ուժերը «բացահայտում» էին Մարտի 1-ի գործը, և ամենամոլեռանդ «բացահայտողը» Փաշինյանն էր, բայց կարծես այլ պայմանավորվածություն կա, տպավորություն է, որ գործը փակելու վերաբերյալ ընդհանուր փոխհամաձայնության են եկել քաղաքական ուժերը, նախագահները…
ՍԴ որոշումից հետո ՀԱԿ-ը անգամ ծպտուն չի հանել, բայց չէ՞ որ Մարտի 1-ի զոհերի ծնողները, տուժողներն իրենց էին ապավինել: Իսկ դատախազությունը հայտնվել է ծիծաղելի վիճակում, չգիտես, թե ինչի է սպասում: Հիմա բացահայտվեց այս տասը տարիների խոստումների կեղծիքը Մարտի 1-ի բացահայտման վերաբերյալ, պարզ դարձավ, որ չի բացահայտվելու, և Մարտի 1-ի զոհերի հարազատներն ու տուժողները մնացին մեն-մենակ՝ իրենց ողբերգության հետ»,- նշեց Ալեքսանյանը:
«Վեթինգով չանցած, չբարեփոխված համակարգերից սպասել, որ կանեն այնպիսի գործողություններ, որոնց արդյունքում կբացահայտվեն իրենց հանցագործությունները, ուղղակի անտրամաբանական է: Քննչական մարմիններ, ԱԱԾ, դատախազություն… բոլորի տիրույթում այս գործը եղել և, և ասել՝ դուք արել եք հանցագործություններ, բայց եկեք գիծը քաշենք, և նույն կազմով դուք ինքներդ ձեզ մեղադրանք առաջադրե՞ք. ինչպե՞ս է դա հնարավոր»,- նշեց իրավապաշտպան Նինա Կարապետյանցը՝ հավելելով, որ ՍԴ այս որոշումը սպասելի էր, և զարմանալի էր, որ հայտարարում էին, թե ՍԴ թնջուկը լուծվել է:
«Մարտի 1-ի գործը կազմակերպիչների մասով փակված է, իսկ դա ամենակարևոր մասն է…Այս համակարգը ի վիճակի չէ ո՛չ մեղադրանք առաջադրելու, ո՛չ էլ այդ մեղադրանքը պաշտպանելու»,- նշեց Կարապետյանցը:
Մանրամասները՝ տեսանյութում: