Վրաստանի նախկին նախագահ Միխեիլ Սահակաշվիլին, որը հայրենիքում անցնում է մի շարք քրեական գործերով, ներկայիս իշխանություններին առաջարկել է իրեն թույլ տալ մեկ օրով մուտք գործել երկիր՝ բնակչության արձագանքը տեսնելու համար:
Վրաստանի նախկին ղեկավարը կարծում է, որ Թբիլիսին չի ցանկանում ցույց տալ, որ ժողովուրդն աջակցում է Սահակաշվիլիին:
«Եկեք հետաքննական փորձ անցկացնենք: Թող ինձ թույլ տան մտնել երկիր, 24 ժամ լինել փողոցում, երդվում եմ՝ ես կլինեմ առանց թիկնազորի: Ժողովրդին հնարավորություն տանք ազատորեն արտահայտելու իր կարծիքը»,- ասել է նա TV Pirveli-ի եթերում:
Քաղաքական գործիչն ընդգծել է, որ հենց նա «ոտք դնի վրացական հողում, պարզ կդառնա», որ ներկայիս իշխանությունների աջակցությունը 5% է, իսկ իրենը՝ 70-75%: Նա նշել է, որ վրացի պաշտոնյաները բազմիցս ժամանել են Ուկրաինա և խնդրել տեղի իշխանություններին չհանձնել իրեն Թբիլիսիին:
