Սահմանադրական դատարանի որոշումը հասարակության մոտ բացասաբար է ընդունվելու, քանի որ այդ որոշման համաձայան դադարեցվելու է Ռոբերտ Քոչարյանի նկատմամբ քրեական հետապնդումը այն հիմնական հոդվածով, որով մեղադրվում էր, այսինքն՝ սահմանադրական կարգը տապալելու մեջ: Այս մասին «Առաջին լրատվական»-ի հետ զրույցում նշեց փաստաբան Գևորգ Դավթյանը՝ անդրադառնալով Սահմանադրական դատարանի այսօր կայացրած որոշմանը, ըստ որի՝ Քրեական օրենսգրքի 301.1 հոդվածը Սահմանադրությանը հակասող և անվավավեր է ճանաչվել:
«Մենք պետք է համարենք, որ Քրեական օրենսգրքի 301.1 հոդվածը գոյություն չունի, հետևաբար դրա հետ փոխկապակցված բոլոր ակտերը պետք է վերացվեն: Հասարակությունը սա չի ընդունելու, որովհետև այդ հոդվածի տակ հասարակությունը տեսնում էր Մարտի 1-ը, զորքերի Երևան բերելը, ժողովրդի իրավունքների սահմանափակումը, ինչպես նաև 10 զոհերի հետ կապված փոխկապակցվածությունը, հետևաբար 301.1 հոդվածը հանելը չի կարող չառաջացնել հասարակության և շատ մասնագետների դժգոհությունը»,- նշեց Դավթյանը: Փաստաբանի խոսքով՝ առաջին հերթին խտրական վերաբերմունք է ցուցաբերվել, ավելի վաղ պետք է կայացվեր որոշում այդ հոդվածի վերաբերյալ, ոչ թե հիմա:
«Որքանո՞վ է արդարացի և արժանապատիվ ունենալ ակնհայտ հանցագործություն մարտի 1-ի տեսքով, և դրանից հետո 13 տարի շարունակ չկարողանալ բացահայտել որևէ բան այս գործի հետ կապված,- ընդգծեց քաղաքագետ Էմիլ Օրդուխանյանը,- սա նշանակում է, որ ՀՀ-ն ճահճից դուրս գալու միտումներ ցույց չի տալիս, և արդարադատության համակարգն այս երկրում չի կարողանում լուծել իր առջև դրված խնդիրը. սա ամոթալի բան է»:
Վերլուծաբան Դավիթ Ստեփանյանը նշեց, որ սահմանադրական կարգի տապալման մեջ մեղադրանքը ամենաչնչին հոդվածն էր, որով կարելի էր դատել Ռոբերտ Քոչարյանին: «Նրա գործած հանցանքներն այնքան մեծ են, որ տասը հոգու մահը, համեմատած նրա այլ հանցագործությունների հետ, շատ փոքր է. Ռոբերտ Քոչարյանը տասը տարվա մեջ վաճառել է Հայաստանը, վաճառել է Հայաստանի ինքնիշխանությունը: Եվ եթե որևէ նոր իշխանություն փորձի նրան դատել հենց այդ հոդվածով, այդ հոդվածը թելի նման կգնա ու կհասնի Մոսկվա, այսինքն՝ մենք հասկանում ենք՝ ինչու դա չի արվել և ինչու չի կարող արվել»,- ընդգծեց վերլուծաբանը:
Մանրամասն՝ տեսանյութում: