Երեկ էկոնոմիկայի նախարար Վահան Քերոբյանը ներկայացրել է Վիճակագրական կոմիտեի հրապարակած 2021 թվականի փետրվար ամսվա տնտեսական ակտիվության ցուցանիշը (ՏԱՑ), որը -5,3 տոկոս է։ Ֆեյսբուքյան իր էջում նա գրել է․ «Հաշվի առնելով այն փաստը, որ անցած տարվա փետրվարը մեկ օրով ավելի էր՝ Հայաստանի տնտեսությունը համարյա վերականգնվել է։ Ու դա դեռ զրոյին մոտ տուրիզմի պարագայում»։
Շատ տնտեսագետներ նշում են, որ այս հայտարարությունը չի կարող որևէ հիմնավորում ունենալ, որովհետև ինչ վերականգնման մասին կարող է խոսք գնալ, երբ տնտեսական ակտիվության նվազում ունենք։ Ինչպիսի՞ն են ձեր մեկնաբանությունները․ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Բաբկեն Թունյանը պատասխանեց․ «2021 թվականի փետրվար ամսվա տնտեսական ակտիվության ցուցանիշը (ՏԱՑ), որը -5,3 տոկոս է, իսկ հունվար ամսին, եթե չեմ սխալվում` այն կազմել է 8,2 տոկոս։ Այսինքն՝ մենք ունենք անկման դանդաղում։ Կարծում եմ, որ մարտ, ապրիլ և հետագա ամիսներին այդ դանդաղումն ավելի ակնհայտ կլինի, ավելին՝ մենք կարող է ունենանք դրական ցուցանիշ։ Ինչի համար, որովհետև անցյալ տարվա հունվար ու փետրվար ամիսներին, կորոնավիրուսով պայմանավորված, ճգնաժամ դեռ չկար, ու բազան բավականին բարձր էր։ Երկնիշ թվով տնտեսական աճի մասով Վահան Քերոբյանը նշել է, որ դա իր նպատակն է, իսկ ամեն մեկը կարող է նման նպատակներ ունենալ։ Շատ նորմալ է, որ նախարարն իր առջև դրել է տնտեսական երկնիշ աճի նպատակ։ Գնահատականներն ու կարծիքները կարող են տարբեր լինել։ Ես կարծում եմ, որ այս տարի լինելու է կայունացման տարի, և հակված չեմ դրան թվային արտացոլանքներ տալ»։
Մանրամասները՝ տեսանյութում։