«Վերջին զարգացումների հետևանքով մենք հայտնվել ենք այնպիսի եզրագծի, որ բոլոր նրանք, ովքեր քիչ թե շատ մտահոգ են մեր երկրի ապագայով, կարող են և պետք է հանդիպեն՝ մի կողմ դնելով նախկինում ունեցած բոլոր հակասությունները: Մենք ըստ էության գտնվում ենք փակուղում, Նիկոլ Փաշինյանի իշխանավարումը օր օրի ավելի է խորացնում այդ փակուղին, և նախկին նախագահները պետք է այս փակուղուց դուրս գալու ճանապարհներ որոնեն»,- «Առաջին լրատվական»-ի հետ զրույցում ասաց իրավապաշտպան Վարդան Հարությունյանը՝ անդրադառնալով ՀՀ և Արցախի նախկին նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի, Արկադի Ղուկասյանի և Բակո Սահակյանի հանդիպմանը և չբացառելով, որ այդ կարգի հանդիպումներ կրկին կլինեն:
Մեր զրուցակցի խոսքով՝ ներքաղաքական զարգացումներն այլևս էական չեն, երբ խաղաքարտին են դրված Արցախի լինելիության և մեր պետության ապագայի խնդիրները. «Ով կգա իշխանության, ինչպիսին կլինի այդ իշխանությունը՝ կոռումպացված, թե ոչ, այդ բոլոր հարցերը երկրորդ պլան են մղվում, երբ պատերազմ է, երբ դրված է լինելիության խնդիր: Մենք միշտ էլ կարող ենք ոտքի կանգնել և մեր ներքին խնդիրները լուծել, բայց դրա համար պետք է լինի մի կարևոր նախապայման՝ պետք է լինի պետությունը, պետք է լինի Արցախը: Էլ չեմ ասում, որ հանդիպած քաղաքական գործիչները լինելու են տարբեր քաղաքական ճամբարներում, ուստի անտեղի կլիներ ներքին զարգացումների մասին խոսելը. դա կվերածվեր վեճի, ոչ թե քննարկման»:
Իրավապաշտպանը նկատեց, որ երեք նախկին նախագահներն էլ ներքաղաքական զարգացումներին ակտիվ մասնակցում են. «Իզուր է հանրությանը թվում, թե Լևոն Տեր-Պետրոսյանի հաղորդագրությունները կարճ են. դրանք շատ տարողունակ են, շատ բովանդակալից են և քաղաքական օրակարգ են ձևավորում: Նրա բոլոր երեք հաղորդագրություններն էլ վերաբերել են մեր լինելիությանը»:
Ինչ վերաբերում է Ռոբերտ Քոչարյանին և Սերժ Սարգսյանին, Վարդան Հարությունյանը կարծում է, որ Ռոբերտ Քոչարյանին 2018-ից հետո ձևավորված իշխանությունները ներքաշեցին ներքաղաքական դաշտ և ստիպեցին վերադառնալ քաղաքականություն. «Սերժ Սարգսյանի պարագան մի քիչ այլ է. նրան մեր հանրությունն ընդհանրապես մերժեց: Նման մեծ մերժումից հետո ցանկացած քաղաքական ուժ, որպես կանոն, պետք է ասպարեզից հեռանար: Բայց նա ասպարեզից չհեռացավ ոչ թե այն պատճառով, որ կենսունակ է, այլ այն պատճառով, որ Փաշինյանի իշխանությունը որպես իր հիմնական ախոյան և թիրախ շարունակեց նրանց պահել: Փաշինյանը բանավիճում էր մահացած քաղաքական ուժի հետ և իր այդ բանավեճերով վերակենդանացրեց այդ քաղաքական ուժին, բերեց հրապարակ և այսօր էլ այդպես է շարունակում: Քանի որ Ռոբերտ Քոչարյանի ու Սերժ Սարգսյանի իշխանավարումը մեր հանրության հիշողության մեջ մնացել է որպես բացասական երևույթներ, Նիկոլ Փաշինյանը փորձելու է այդ բացասականի վրա շեշտը դնելով մեր հանրության մեջ իր նկատմամբ համակրանք առաջացնել: Հանրությունը, սակայն, այդքան միամիտ չէ, որպեսզի երկրորդ անգամ գնա նույն ճանապարհով և հայտնվի նույն փոսում: Նախկիններն այսօր գտնվում են հրապարակում և օրակարգ են թելադրում Փաշինյանի վարած ապաշնորհ, տապալված քաղաքականության հետևանքով»:
Վարդան Հարությունյանը առանձնացնում է այս երկուսից Լևոն Տեր-Պետրոսյանին. «Նա 2008 թվականից հետո ներկայացրած հայտով շարունակում է մնալ մեր քաղաքական առանցքային դեմքերից մեկը: Մենք մերժեցինք արժանապատիվ խաղաղության գնալու նրա ճանապարհը և ընտրեցինք ուժերի, որոնք մեզ բերեցին ջախջախիչ պարտության»:
Առավել մանրամասն՝ տեսանյութում:
