Վենետիկի հանձնաժողովը ԸՕ-ի վերաբերյալ իր կարծիքը կհայտնի ապրիլին: Դա հույսեր է ներշնչում, բայց երաշխիք չէ, որ ընտրություններն անխոչընդոտ կընթանան: Կառավարող ուժի ներսում դեռևս խմորումներ են գնում ԸՕ շուրջ, սպասենք՝ տեսնենք կփոխվի, թե չի փոխվի: Այս մասին «Առաջին լրատվական»-ի հետ զրույցում նշեց «Քաղաքացու որոշում» կուսակցության գործադիր մարմնի անդամ Հայկ Սահակյանը:
«Հանուն հանրապետության» կուսակցության անդամ Արտաշես Խալաթյանը կարծիք հայտնեց, որ համամասնական ընտրակարգին անցումը դեռ վաղուց պետք տեղի ունենար. «Ձայն բերողի արատավոր ինստիտուտի առկայությունը հիմնականում պայմանավորված էր մեծամասնական ընտրակարգի գոյությամբ»,-նշեց Խալաթյանը:
«Արդար Հայաստան» կուսակցության անդամ Սամվել Պողոսյանը հավելեց, որ համամասնական ընտրակարգին անցնելը մեկ քայլ առաջ կլինի:
Քննարկման մասնակիցների դիտարկմամբ՝ արտահերթ ընտրություններով քաղաքական ճգնաժամը չի մարի:
Նախօրեին ԱԺ-ն ռազմական դրությունը վերացնելու մասին որոշում կայացրեց, այսօր էլ ԱԺ-ն ընդունել է ԲՀԿ պետական դավաճանության մասին օրինագիծը:
Խալաթյանի դիտարկմամբ՝ ռազմական դրության չեղարկումը ճիշտ քայլ էր, քանի որ ռազմական դրության պահպանումը կարող էր դիտարկվել որպես իշխանության թուլության նշան: «Ինչ վերաբերում է պետական դավաճանության մասին օրինագծին, իշխանությունը պետք է վեր կանգնի քաղաքական սադրանքներից և չմերժի այդ օրինագծի ընդունումը»,- ասաց Խալաթյանը:
Զինված ուժերը պետք է զեկույց պատրաստեն պատերազմի մասին՝ Օնիկ Գասպարյանի գլխավորությամբ. այս մասին այսօր հայտարարել է ԱԽ քարտուղար Արմեն Գրիգորյանը: Անդրադառնալով այս դիտարկմանը՝ Սամվել Պողոսյանը նշեց. «Շատ կարևոր է, որ Զինված ուժերը զեկույց պատրաստեն պատերազմի մասին: Տեսնում ենք, որ Օնիկ Գասպարյանն այսօր ընդդիմադիր է դարձել, այս իշխանության մարդը չէ, հետևաբար, եթե այս իշխանությունները իսկապես դավաճանության մեջ մեղք ունեն, ինչպես որ նրանց մեղադրում են փողոցում պայքարող որոշ ընդդիմադիրներ, դա շատ հեշտ կլինի բացահայտելը, քանի որ նա ամեն ինչի ականատեսն է եղել: Իշխանությունը հիմա նրան հնարավորություն է տվել զեկույց կազմել և ներկայացնել հանրությանը, թե ինչ է եղել իրականում ( հավանաբար իշխանությունները վստահ են, որ իրենք մեղք չունեն): Դա կարևոր քայլ է, որպեսզի իմանանք, թե իրականում ինչ է եղել:
Այսօր դավաճանություն բառն այնքան է էժանացել, որ այն սովորական բառ է դարձել, բայց պետական դավաճանությունը ամենամեծ հանցանքն է, պետական դավաճաններին չպետք է ների ոչ ոք ոչ մի տեղ: Իսկ հիմա աջ ու ձախ միմյանց մեղադրում են դավաճանության մեջ, եթե հավատանք ստացվում է, որ ազգի 95 տոկոսը դավաճան է:
Պետական դավաճանության մասին օրինագիծը շատ կարևոր է, մյուս ուժերը չպետք է տրվեն նրան, որ եթե ուրիշ կուսակցություն է առաջարկել դեմ գնան, եթե լավ բան է առաջարկվում, պետք է կողմ լինել»:
Մանրամասն՝ տեսանյութում: