Ռուսերենը Արցախում պաշտոնական լեզվի կարգավիճակ է ստացել, որոշումն ընդունվել է ԱԺ- ում։ Արցախի կյանքում սա ի՞նչ նշանակություն և դերակատարում կարող է ունենալ, և արդյո՞ք սա կարելի է պրոյեկտել Արցախի անվտանգության հետ․ «Առաջին լրատվական»-ի հարցին «Հանուն Հանրապետության» կուսակցության ղեկավար մարմնի անդամ Ռուբեն Մեհրաբյանը պատասխանեց․ «Բավականին բացասական, բայց և ուշագրավ այս իրադարձությունը բխում է այն իրողություններից, որոնք ձևավորվեցին 44-օրյա պատերազմի հետևանքներով, և կարելի էր սպասել, որ նման զարգացումներ, այսպես ասած՝ կհայտավորվեն որոշ ազդեցության խմբերի կողմից, բայց որ նման անդիմադիր ձևով՝ 27 կողմ և 2 ձեռնպահ, և գեթ մեկը չկար, որ սրան դեմ քվեարկեր, սա շատ վատ բաների մասին է խոսում։ Սա, իմ համոզմամբ՝ Հայաստանի իշխանությունների, այսպես ասած՝ որոշակի քաղաքական սրբագրումների հիմք է հանդիսանում։ Եթե մենք ասում ենք, որ արցախահայությունը մեր անբաժանելի մասն է, ապա այն ստանդարտները, որ գործում են Հայաստանում, պետք է գործեին նաև Արցախում։ Ի վերջո, եթե դուք ձեր նամակները ռուսական խաղաղապահ ուժերին ուզում եք գրել ռուսերեն, գրեք ռուսերեն՝ ինչ լեզվով ուզում եք գրեք, օրենքն ինչո՞ւ եք փոխում։
Երկրորդը՝ ես չգիտեմ պաշտոնական Երևանի դիրքորոշումն այս հարցում։ Ցավոք սրտի, ես կարծում եմ, որ այսպես անդիրքորոշում էլ կմնա։ Բայց մյուս կողմից էլ հարցեր են առաջանում․ տարբեր կասկածելի մարդկանց, տարբեր պատանի զորիբալայաններին պաշտոնին նշանակելուց հետո գալիս են ու մեզ բացատրում, թե մենք ինչ պետք է անենք, ինչ պետք է չանենք, դա մի կողմից։ Մյուս կողմից՝ Արցախի կարգավիճակի հետ կապված, երբ պաշտոնական Երևանը փորձում է ԵԱՀԿ Մինսկի խմբի եռանախագահության ձևաչափում կարգավիճակի հարց բարձրացնելը դարձնել օրակարգային հարց, ապա Ստեփանակերտից ինչ-որ երկակի կարծիքներ ենք լսում»։
Մանրամասները՝ տեսանյութում։