Վիճակագրական կոմիտեն հրապարակել է 2021 թվականի փետրվար ամսվա տնտեսական ակտիվության ցուցանիշը (ՏԱՑ), որը -5,3 տոկոս է։ Էկոնոմիկայի նախարար Վահան Քերոբյանը ֆեյսբուքյան իր էջում գրել է․ «Հաշվի առնելով այն փաստը, որ անցած տարվա փետրվարը մեկ օրով ավելի էր՝ Հայաստանի տնտեսությունը համարյա վերականգնվել է։ Ու դա դեռ զրոյին մոտ տուրիզմի պարագայում»։
Ինչի՞ հաշվին է վերականգնվում մեր տնտեսական ակտիվությունը․ «Առաջին լրատվական»-ի հարցին տնտեսագետ Էդվարդ Տերտերյանը պատասխանեց․ «Անկեղծ ասած՝ ես տնտեսության ակտիվության, առավել ևս վերականգնման որևէ դրական դինամիկա չեմ տեսնում։ Իմ համար գոնե այս պահին անհասկանալի են այն պնդումները, թե տնտեսությունը վերականգնվել է՝ նույնիսկ զրոյական վիճակ, որովհետև այսօր առանձին ձեռնարկությունների, ճյուղային կամ ոլորտային մասով չկան այդպիսի ցուցանիշներ։ Հիմնականում բոլորը գրանցում են ցածր ցուցանիշներ։ Դրա մասով ես չեմ կարող համաձայնվել, որ գոնե զրոյական դիրքում է։ Իմ կարծիքով՝ այս անկումը դեռ շարունակվելու է, և հետագայում ավելի վատ է լինելու»։
Իսկ ԱԺ «Իմ քայլը» խմբակցության պատգամավոր Գևորգ Պապոյանը հակադարձեց․ «Անցյալ տարի փետրվարին Covid չկար, և տնտեսությունն աշխատում էր սովորական կյանքով։ Մարտ ամսից մենք ունեցել ենք սահմանափակումներ, և տնտեսությունն անկում է ապրել։ Հետևաբար, երբ մենք նախորդ ամիսների հետ ենք համադրում՝ տարբեր ամիսների անկումը տարբեր է եղել, ապա տեսնում ենք, որ մենք ակտիվ վերականգնման փուլի մեջ ենք։ Իմ գնահատականով՝ մարտին և դրան հաջորդ ամիսներին մենք ունենալու ենք տնտեսական աճ»։
Մանրամասները՝ տեսանյութում։
