Ազգային ժողովում այսօր ընդունվեց ռազմական դրությունը չեղարկելու վերաբերյալ որոշում: Ռազմական դրության վերացման համար կարևորագույն հիմքն այն է, որ երկրում ռազմական դրությունը պահպանելու որևէ նախադրյալ չկա: Այս մասին «Առաջին լրատվական»-ի հետ զրույցում նշեց ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը՝ անդրադառնալով հարցին, թե արդյոք այդ որոշումը պայմանավորված էր հայաստանյան ներքաղաքական իրավիճակով:
«Ռազմական դրության պայմաններում երկրում ընտրություններ չեն կարող անցկացվել, սա սահմանադրական կանոն է, բայց ես այս երկու գործընթացների՝ ռազմական դրության չեղարկման և արտահերթ ընտրությունների անցացման միջև ուղղակի կապ չեմ տեսնում: Պարզ է, որ երկրում իրավիճակի կայունացմանը զուգահեռ ռազմական դրությունը պետք է հանվի»,- նշեց Վարդանյանը:
Պատգամավորի խոսքով՝ արտահերթ ընտրությունների օրն արդեն հայտարարվել է, և հիմք չկա ենթադրելու, որ այլ օր կտեղափոխվի: «ԱԺ լուծարման բավականին բարդ ընթացակարգ է նախատեսված, ժամկետները կարճ են»:
Անդրադառնալով հարցին, թե արտահերթ ընտրություններն ինչ ընտրակարգով կկազմակերպվեն՝ փակ համամասնակա՞ն, Վարդանյանը նշեց, որ դա այն հանձնառությունն էր, որ ուներ ՔՊ-ն և «Իմ քայլը» դաշինքը՝ նախընտրական ծրագրով, դա արտացոլված է նաև այլ խորհրդարանական ուժերի՝ մասնավորապես ԼՀԿ-ի նախընտրական ծրագրում:
«Համակարգը չի փոխվում. խորհրդարանական կառավարմանն անցնելուն զուգահեռ անցել ենք համամասնական ընրտակարգի: Ամբողջական համամասնական ընտրակարգի շրջանակներում նախատեսվել էր բարդացված ընթացակարգ, այսպես կոչված ռեյտինգային, որը չէր փոխում համամասնական ընտրակարգը: Հիմա փակ համամասնական ընտրակարգով են տեղի ունենալու ընտրությունները:
Վենետիկի հանձնաժողովը որոշում է կայացրել, ապրիլի կեսերին կստանանք հանձնաժողովի կարծիքը, դա հնարավորություն կտա համապատասխան շտկումներ անել ԸՕ-ում»,- նշեց պատգամավորը:
Վարդանյանի խոսքով՝ ռեյտինգային ընտրակարգը Հայաստանում հանգեցնում էր խաթրի ընտրությունների. «Հայաստանում շատ քիչ է գաղափարական պայքարը, բայց մեզ պետք է այնպիսի ընտրակարգ, որ քաղաքացիները հնարավորություն ստանան ծանոթանալ ծրագրերին, ոչ թե անհատներին: Վառ անհատները դեռևս գաղափարախոսություն չեն, գաղափարախոսությունը հնարավորություն է տալիս վառ անհատներին դրսևորվել»:
Մանրամասն՝ տեսանյութում: