Մարտի 16-ին Արցախի արտաքին գործերի նախարար Դավիթ Բաբայանը Երևանում հանդիպում է ունեցել Շվեդիայի արտաքին գործերի նախարար, ԵԱՀԿ գործող նախագահ Անն Լինդեի հետ։
Ինչպիսի՞ն է ձեր տպավորությունն այդ հանդիպումից․ այն այց էր այցի համա՞ր, թե՞ իր մեջ ուղերձներ էր պարունակում․ «Առաջին լրատվական»-ի հարցին Արցախի արտաքին գործերի նախարար Դավիթ Բաբայանը պատասխանեց․ «Իհարկե, դա այց չէր պարզապես այցի համար։ Հասկանալի է, որ ԵԱՀԿ գործող նախագահը մի յուրահատուկ ինստիտուտ է։ Գիտեք, որ այդ պաշտոնը ստանձնվում է ռոտացիոն հիմքի վրա։ Այս անգամ այդ պաշտոնը ստանձնել է Շվեդիայի արտգործնախարարը։ Պետք է նշեմ, որ նման հանդիպումներ միշտ եղել են՝ դրանք ավանդական հանդիպումներ են։ Արցախի լեգիտիմ իշխանության՝ պաշտոնական Ստեփանակերտի հետ այդ հանդիպումները միշտ եղել են, և հուսով եմ, որ այսուհետ ևս կլինեն։ Հետևաբար, դա հանդիպում էր, որի ընթացքում նախ և առաջ պահպանվում է բանակցային գործընթացի շարունակականությունը։ Երկրորդը՝ ԵԱՀԿ-ն կրկին ֆիքսում է, որ գործընթացի մեջ է։ Բացի դրանից՝ մենք մեր կարծիքներն ենք փոխանակել։ Նրանց ներկայացրել ենք իրավիճակը՝ թե՛ պատերազմի ընթացքը, թե՛ հետևանքները, թե՛ առկա կարևորագույն խնդիրները, այդ թվում նաև մարդասիրական հարցերը, որոնք շատ կարևոր են։ Բնական է՝ քննարկվել են նաև կարգավորմանն առնչվող խնդիրներ»։
Ի՞նչ տրանսֆորմացիաների է ենթարկվել Հայաստան-Արցախ հարաբերությունները նոյեմբերի 9-ից հետո․ «Առաջին լրատվական»-ի հարցին Դավիթ Բաբայանը պատասխանեց․ «Երևանում հանդիպում եմ ունեցել նաև Հայաստանի արտգործնախարարի հետ, և բարձր եմ գնահատում մեր համատեղ աշխատանքը և այն մակարդակը, որը գրանցվել է մեր փոխգործակցության մեջ։ Բնական է, ես պաշտպանության նախարարի հետ չէի կարող խոսել բանակաշինությանն առնչվող հարցերից, որովհետև դա իմ ոլորտը չէ։ Իսկ երկու հայկական պետությունների միջև փոխգործակցությունը միշտ էլ պետք է լինի բարձր մակարդակի վրա, որովհետև մենք մի հայրենիք ենք, բայց երկու տարբեր պետություններ»։
Մանրամասները՝ տեսանյութում։