Մոտ մեկուսուկես տարի տևած դատական նիստերից հետո դատավոր Աննա Դանիբեկյանը հայտարարեց, որ սահմանադրական կարգը տապալելու համար մեղադրվող Ռոբերտ Քոչարյանի և նրա նախկին ենթակաների գործը մտնում է դատաքննության փուլ: Ռոբերտ Քոչարյանի պաշտպանները, ի նշան բողոքի, բոյկոտեցին և լքեցին դատարանը:
Թեմայի շուրջ «Առաջին լրատվական»-ի հետ զրույցում ՄԱՀՀԻ-ի հիմնադիր, քաղաքագետ Ստեփան Սաֆարյանը նկատեց, որ միջնորդությունների տարաբնույթ հեղեղը, որով հանդես են եկել Ռ. Քոչարյանի պաշտպանները, ցույց է տվել, որ ամեն ինչ արվում է, որպեսզի դատաքննությունը չսկսվի և մեղադրական եզրակացությունը չհրապարակվի:
«Ձգձգելու ռեսուրս այլևս չկա. դա գիտակցում է նաև դատավորը: Քոչարյանի փաստաբաններն ամեն ինչ անում են դատավարության ընթացքը կասեցնելու համար: Նրանց միակ փրկօղակը մնացել էր ՍԴ որոշումը, այսօր փաստաբաններից մեկը չթաքցրեց, որ միգուցե դատավորը սպասեր, որպեսզի պարզ դառնար, թե Քոչարյանի մեղադրանքի հիմքը կազմող հոդվածը սահմանադրակա՞ն է, թե՞ ոչ: ՍԴ շուրջ զարգացումները ցույց տվեցին, որ Քոչարյանի պաշտպաններն այնպիսի ստրատեգիա են ընդունել, որ թույլ չտան դատաքննության մեկնարկը: Իսկ թե ինչ կորոշի ՍԴ-ն, առաջիկայում պարզ կլինի»,- նշեց քաղաքագետը:
Սաֆարյանի գնահատմամբ՝ ՍԴ որոշ անդամներ չեն տարբերվում Ռ. Քոչարյանի պաշտպաններից, սպասարկում են Քոչարյանի շահերը և շահագրգռված չեն, որ Մարտի 1-ի գործը քննվի:
Մանրամասն՝ տեսանյութում: