Չի բացառվում՝ Փաշինյանը հայտարարի, որ արտահերթ ընտրությունների անհրաժեշտություն չկա

Ընտրական օրենսդրության և սահմանված խաղի կանոնների հարցը անշուշտ հույժ կարևոր է, քանի որ դրանցով է նաև որոշվում, թե ինչ սողանցքներ են թողնվում, այսպես ասած, հին քաղաքական մշակույթի և «ավանդույթների» դրսևորման համար: Մյուս կողմից, սակայն, մտածել, թե այդ ամենը կախված է օրենսդրությունից միայն, կլինի ինքնախաբեություն: Ի վերջո, ամեն ինչի, այդ թվում՝ օրենսդրության աշխատանքի աղբյուրը քաղաքական կամքն է և այդ կամքի իրացումը: Այդ իմաստով որևէ օրենսդրական ռեֆորմ արվում է թերևս երկարատև ադապտացիայի ակնկալիքով կամ պետք է արվի այդպես, որովհետև օրենսդրությունն ինքնին չի լինի արդյունավետ, եթե զուգահեռ չընթանա քաղաքական մշակույթի և մտածողության համարժեք ռեֆորմացիա: Այդպիսով, հազիվ թե նոր օրենսդրությունը փոխի էական բան, եթե դա չի փոխվելու քաղաքական ուժերի վարքագծում: Թեմայի շուրջ «Առաջին լրատվական»-ը զրուցել է «GALLUP International association»-ի հայաստանյան ներկայացուցչության տնօրեն Արամ Նավասարդյանի և «Հանուն Հանրապետության» կուսակցության ՂՄ անդամ Արտաշես Խալաթյանի հետ: