Քրիստոնեա-ժողովրդավարական կուսակցությունը կմասնակցի արտահերթ խորհրդարանական ընտրություններին: Այս մասին «Առաջին լրատվական»-ի հետ զրույցում հայտարարեց կուսակցության նախագահ, քաղաքագետ Լևոն Շիրինյանը: «Ես մի նպատակ ունեմ՝ խորհրդարանական պայքարը ազգայիններ-ապազգայիններ արհեստական հակադրությունից դուրս բերել և դասական պառլամենտարիզմի ճանապարհ տանել՝ աջեր, ծայրահեղ աջեր, ձախեր, ծայրահեղ ձախեր և կենտրոն, ինչպես նաև էկոլոգներ պետք է լինեն խորհրդարանում՝ որպես շրջակա միջավայրի պահպանության շահագրգիռ միավորում»,- նշեց Շիրինյանը՝ հավելելով, որ չի բացառվում, որ Քրիստոնեա-ժողովրդավարական կուսակցությունը ընտրություններին ընդառաջ կոալիցիայի մաս կկազմի:
«Հեղափոխությունը իսկապես ճանապարհ բացեց հայ ժողովրդի համար դեպի իր արժեքային համակարգ, դեպի ժողովրդավարություն հաստատելու և գողապետությունից ազատվելու հնարավորություն, սա չարություն առաջացրեց ներսի բանդաների և արտաքին ուժերի մոտ, նրանք որդեգրեցին մի ռազմավարություն՝ Հայաստանում կայուն պահել անկայունությունը: Գողապետությունը, որ շշմած էր հարվածից և հայ ժողովրդի ատելությունից, աշխուժացել է՝ նաև դրսի օժանդակությամբ, և այժմ օգտագործվում է, որովհետև եթե չօգտագործվեն, դատարաններում պետք է պատասխան տան թալանածի ու գողանալու համար»,- նշեց Շիրինյանը:
«Անկայունությունը մեր իրականության մեջ դարձել է կայուն գիծ, անընդհատ ինչ-որ պատճառ են բստրում, ստորությունն այն աստիճանի հասավ, որ սկսեցին բանակը բզբզել՝ ըստ իրենց կլանային շահերի և Մոսկվայից աջակցություն ստանալով… Գեներալիտետը շտապ պետք է մաքրվի. օտար շահեր սպասարկողներ շատ կան»,- ընդգծեց քաղաքագետը:
Մանրամասները՝ տեսանյութում:
