Կորոնավիրուսով վարակվածների թիվը Հայաստանում սկսել է աճել։ Դրա պատճառը զանգվածային միջոցառումնե՞րն են, թե՞ սանիտարահիգիենիկ պայմանների չպահպանելը․ «Առաջին լրատվական»-ի հարցին ԵՊԲՀ Հանրային առողջության և առողջապահության կազմակերպման ամբիոնի ավագ դասախոս Դավիթ Մելիք-Նուբարյանը պատասխանեց․ «Որպես կանոն՝ նման իրավիճակները մեկ պատճառ չեն ունենում։ Գոյություն է ունենում պատճառների մի մեծ խումբ։ Եթե մենք կոնկրետ խոսենք երրորդ ալիքի մասին, ապա պատճառները կարող ենք բաժանել մի քանի մասի։ Առաջին պատճառը, որ նպաստեց նոր բռնկմանը, դա կրթական հաստատությունների բացումն էր։ Ոչ թե նրա համար, որ կրթական հաստատություններն իրենք իրենցով տարածում են համավարակը, այլ իրենք մեծացնում են մարդկանց մեջ շփումները։ Խոսքը նրա մասին է, որ մոտ կես միլիոն մարդ վերադառնում է իր բնականոն շփումների ռիթմին։ Հատկապես, խոսքը վերաբերում է բուհերին, որովհետև ուսանողներն ավելի ակտիվ են։
Երկրորդ պատճառը սահմանների բացումն էր՝ բոլորը կարող են գալ ու գնալ, թեև այնտեղ թեստավորում է պահանջվում, բայց որքանով է ստուգվում, որ այդ թեստը բացասական է՝ մենք դա չգիտենք։ Մի խոսքով, թղթի հիմքով, որ նրանք ունեն բացասական թեստ, մարդիկ գալիս են, բայց նրանք ինչպես են ձեռք բերել այդ թուղթը՝ չգիտենք։
Իսկ երրորդ պատճառը ես կնշեի հավաքները, որոնք իրենց դերակատարումն ունեցել են»։
Եթե այսպես շարունակվի, ապա մենք առաջիկայում կվերադառնա՞նք այն վիճակին, երբ հիվանդները որոշ ժամանակ սպասում էին՝ մինչև մահճակալ կազատվեր․ «Առաջին լրատվական»-ի հարցին Դավիթ Մելիք-Նուբարյանը պատասխանեց․ «Նման իրավիճակ եղել է առաջին ալիքի ժամանակ, և, իհարկե, շատ ավելի սուր եղել է երկրորդ ալիքի ժամանակ։ Թվերը փաստում են, որ միայն նոյեմբեր ամսին մահվան դեպքերը հազարից ավելի են եղել։ Մահճակալների թիվն ավարտուն է և, եթե հակահամաճարակային աշխատանքներ չտարվեն, ապա վարակվածների թիվը կաճի ու կգա մի պահ, որ ռեսուրսները չեն բավարարի»։
Մանրամասները՝ տեսանյութում։