Երեք խորհրդարանական ուժերը, գալով համաձայնության, որ հունիսի 20-ին Հայաստանում անցկացվեն արտահերթ խորհրդարանական ընտրություններ, կարծես թե ակտիվ պայքարը տեղափոխեցին նախընտրական փուլ: Բայց եթե գնահատենք այս որոշումը, ապա կարծում եմ, որ դա վատագույն լուծումը չէ, բայց նաև հեռու է լավագույնը լինելուց: Լավագույնը կլիներ այն, որ բոլոր ուժերը՝ ոչ միայն խորհրդարանական, գային կոնսենսուսի և կարողանային ընդհանուր համաձայնությունների փաթեթ հաստատել՝ կապված և՛ Ընտրական օրենսգրքի, և՛ Կառավարության հրաժարականի, և՛ ընտրությունների ժամկետների հետ: Բայց այն, ինչ տեղի ունեցավ, հերթական անգամ ապացուցեց մեր քաղաքական դաշտի ոչ հասուն և ոչ պատասխանատու լինելը: Այս իրավիճակում մենք պետք է ճգնաժամից դուրս գալու լավագույն լուծումները գտնեինք»,- այս մասին «Առաջին լրատվական»-ի հետ զրույցում նշեց Երևանի մամուլի ակումբի նախագահ Բորիս Նավասարդյանը:
Նա նաև ընդգծեց, որ արտահերթ ընտրությունները չեն բացառում քաղաքացիական պատերազմի և պետական ինստիտուտների կաթվածահարման վտանգը:
«Հանուն հանրապետության» ԺՊԴԿ անդամ, փաստաբան Արտաշես Խալաթյանը կարծիք հայտնեց, որ այս բուռն հրապարակային գործողությունների շիրմայից այն կողմ չեն դադարել կուլիսային բանակցությունները, և կողմերը որոշակի ընդհանուր հայտարարի են եկել, օրինակ՝ ընտրական համակարգի շուրջ:
«Գործող իշխանությունը նպատակ է դրել իր քայլերը իրականացնել՝ հիմնվելով իրավունքի գերակայության սկզբունքի վրա»,-նշեց Խալաթյանը:
Բորիս Նավասարդյանը կարծիք հայտնեց, որ խոշոր գործարարներ և վարչական ռեսուրս չունեցող արտախորհրդարանական ուժերը ընտրությունների վրա չեն կարող լրջորեն ազդել, եթե մասնակցեն ընտրություններին:
«Դատական համակարգը չի հետևելու, որ ընտրություններն օրինական լինեն, իրավական մարմինները որոշ չափով բարոյալքված վիճակում են, չեն հասկանում՝ ինչ են պաշտպանելու, ինչու պետք է միջամտեն ընտրությունների բարդ գործընթացին: Ինչ վերաբերում է միջազգային դիտորդներին, քիչ հավանական է, որ այս կարճ ժամանակում կարող ենք դիմել միջազգային կառույցներին և հրավիրել դիտորդներ, նաև ֆինանսավորման խնդիր կա: Տեղական դիտորդները աշխատում են օտարերկրյա դոնորների շնորհիվ, պարզ չէ օտարերկրյա դոնորները կհասցնե՞ն ֆինանսներ հատկացնել: Միանշանակ չէ նաև վիճակը ՏԻՄ-երում, լուրջ քաղաքական հակասություններ կան»,- նշեց Նավասարդյանը:
Նրա դիտարկմամբ՝ Ռուսաստանի դիրքորոշումն այն է, որ արտահերթ ընտրությունների ցանկացած ելք Մոսկվային կբավարարի:
Խալաթյանը հավելեց, որ Ռուսաստանը միշտ վարել է այնպիսի քաղաքականություն, որ թույլ չտա Հայաստանում լինի ուժեղ իշխանություն: «Ռուսաստանը նման է բրոքերի, որը համաձայն է, որ գնես բնակարանը, բայց միայն իր միջնորդավճարը ստանալուց հետո»:
Մանրամասն՝ տեսանյութում:
