«Եկեք սպասենք տեսնենք, թե դատարանն ինչպիսի արդարադատություն կիրականացնի և ինչպիսի դատական ակտ կհրապարակի: Բոլոր մնացած մեկնաբանություններն ինձ համար ընդունելի չեն և մերժելի են»,- «Առաջին լրատվական»-ի հետ զրույցում ասաց «Արդար Հայաստան» կուսակցության նախագահ Նորայր Նորիկյանը՝ անդրադառնալով ԳՇ նախկին պետ Օնիկ Գասպարյանի պաշտոնավարման և պաշտոնանկության շուրջ մեկնաբանություններին:
Մեր զրուցակցի խոսքով՝ այս պահին Հայաստանի Հանրապետությունում աննախադեպ իրավիճակ է ստեղծվել, ինչը հետևանքն է մեր Սահմանադրության անկենսունակության և իրավական համակարգի անկատարության. «Եթե իսկապես Օնիկ Գասպարյանը վերադարձել է աշխատանքի, ապա ես չգիտեմ՝ ի՞նչ հիմքով է ժամանել իր աշխատասենյակ, արդյոք իրավասո՞ւ է արձակել հրամաններ, արդյոք իրավասո՞ւ է իրականացնել Զինված ուժերի Գլխավոր շտաբի պետի գործառույթները՝ առավել ևս այն ֆոնին, երբ նշանակված է Գլխավոր շտաբի պետի ժամանակավոր պաշտոնակատար: Ես այս պահին չեմ կարող որևէ հստակ դիրքորոշում արտահայտել տեղեկատվության բացակայության պատճառով»:
Ինչ վերաբերում է արտահերթ ընտրությունների անցկացմանը և դրա կազմակերպմանը ընդդիմության կամ իշխանության կողմից, Նորայր Նորիկյանը նկատեց. «Ամոթալի է նույնիսկ նման հարցադրումը դարձնել օրակարգային, բայց վերջին 4 ամիսներին, ցավոք, քննարկվում էր հենց այդ հարցը, թե ո՞վ պետք է կազմակերպի ընտրությունները՝ գործող իշխանությո՞ւնը՝ Նիկոլ Փաշինյանի գլխավորությամբ, թե՞, այսպես ասած, սևերը՝ Վազգեն Մանուկյանի գլխավորությամբ: Այսինքն՝ այս մարդիկ ասում են, որ ժողովուրդը խաղից դուրս է, ստալինյան տրամաբանություն է գործում, և կարևոր է ոչ թե այն, թե ով է ընտրում, այլ այն, թե ով է հաշվում ընտրությունների արդյունքները: Ինձ համար անընդունելի է ժողովրդին խաղից դուրս թողնելու որևէ սցենար: Այս իշխանությունը պարտավոր է ապահովել ազատ, արդար ընտրություններ»:
Մեր զրուցակիցը, սակայն, մտավախություն ունի, որ իշխանությունը կարող է կազմակերպել ազատ ու արդար ընտրություններ, քանի որ, նրա խոսքով, երկրում բոլոր հանցագործները ազատության մեջ վխտում են:
Առավել մանրամասն՝ տեսանյութում: