Այս փուլում Վրաստանը չի քննարկում «Sputnik V» ռուսական պատվաստանյութը երկիր ներկրելու հարցը: Այս մասին ճեպազրույցում հայտարարել է Հիվանդությունների վերահսկման և հանրային առողջության ազգային կենտրոնի ղեկավար Ամիրան Գամկրելիձեն:
«Սա բավական զգայուն խնդիր է, և դա ոչ միայն բժշկական հարց է, այլ միանշանակ տեղափոխվում է քաղաքական դաշտ: Ընդհանուր առմամբ, կորոնավիրուսի պատվաստանյութը աշխարհում մեծ քաղաքականության առարկա է դարձել:
Մեծ յոթնյակ, Դավոս, Մյունխեն – պատվաստանյութը թիվ մեկ հարցն է եղել բոլոր այս մեծ տնտեսական հանդիպումներում: Այս փուլում մեր հարաբերություններից ելնելով՝ այս հարցը չի քննարկվում [ռուսական պատվաստանյութի ներմուծման], իսկ Sputnik V պատվաստանյութի անալոգը AstraZeneca- ն է, որն արդեն ժամանել է երկիր», – ասել է Գամկրելիձեն:
Ինչպես գրում է «Նովոստի-Գրուզիան»՝ գլխավոր համաճարակաբանը հիշեցրել է, որ Վրաստանը կօգտագործի միայն այն կորոնավիրուսային պատվաստանյութերը, որոնք թույլատրված կլինեն Առողջապահության համաշխարհային կազմակերպության կողմից:
«Ռուսական պատվաստանյութը չունի այդ թույլտվությունը: Ելնելով դրանից՝ մենք թերահավատ ենք և չենք դիտարկում «Sputnik V» -ի ներմուծումը», – ասել է Գամկրելիձեն: