«Առաջին լրատվական»-ի հարցերին պատասխանել է ԱՆ Հիվանդությունների վերահսկման և կանխարգելման ազգային կենտրոնի իմունականխարգելման և կառավարելի վարակիչ հիվանդությունների համաճարակաբանության բաժնի պետ Սվետլանա Գրիգորյանը:
– Հարևան Վրաստանում սկսում են համատարած պատվաստումների փուլը: Հայաստանում արդեն հայտնի՞ է, թե երբ կտրվի համատարած պատվաստումների մեկնարկը:
– Դեռևս սեպտեմբերից Հայաստանը միացել էր միջազգային COVAX FACILITY նախաձեռնությանը՝ կորոնավիրուսային հիվանդության դեմ պատվաստանյութի ձեռք բերման նպատակով: Այդ շրջանակներում բանակցություններ են վարվում, որպեսզի հնարավորինս շուտ պատվաստանյութը լինի մեր երկրում: Միաժամանակ առողջապահության նախարարությունը բանակցություններ է վարում այլ պատվաստանյութ արտադրողների և միջազգային գործընկերների, այդ թվում՝ ՌԴ-ի հետ, Սպուտնիկ V պատվաստանյութի ձեռք բերման համար: Ամենայն հավանականությամբ Հայաստանում կլինի մոտ ապագայում Սպուտնիկ V պատվաստանյութը, այնուհետև նաև՝ COVAX FACILITY նախաձեռնության շրջանակներում պատվաստանյութը: Կոնկրետ ժամկետներ չեմ կարող ասել, ուղղակի ուզում եմ նշել, որ պատվաստանյութերը առաջարկվելու են առաջին հերթին ռիսկի խմբերում ընդգրկված անձանց: Դրանք 65-ից բարձր տարիքի անձինք են, խրոնիկ հիվանդություններ ունեցողները, բուժաշխատողները, տարեցների խնամքի հաստատություններում բնակվողներն ու աշխատակիցները, այնուհետև, ելնելով պատվաստանյութերի պահանջարկից, պատվաստանյութի առկայությունից և համաճարակաբանական այլ օրինաչափություններից, դրանից հետո միայն որոշում կկայացվի, թե արդյոք ռիսկի խմբերից բացի՝ բնակչության այլ խմբերին կառաջարկվի՞ պատվաստանյութ: Ներկա փուլում դեռ վաղ է ասել, թե երբ կլինի, և կլինի՞, թե՞ ոչ:
– Ընդհանրապես մասնավոր ԲԿ-ները որքանո՞վ են հետաքրքրված, որ իրենք ևս պատվաստանյութեր ձեռք բերեն և արդեն վճարովի սկզբունքով առաջարկեն քաղաքացիներին:
– Չեմ կարող ասել, թե որքանով են հետաքրքրված, բայց բնակչության մեջ կա պահանջարկ, մանավանդ շատերն ուզում են ապահովագրված լինել ճանապարհորդելուց առաջ: Ես այս պահին չեմ կարող ասել, թե արդյոք ինչ-որ գործընթացներ իրականացվո՞ւմ են մասնավոր կազմակերպությունների կողմից պատվաստանյութ ձեռք բերելու ուղղությամբ: Կարծում եմ՝ այդ հարցը իրենց պետք է ուղղեք, բայց կարծում եմ՝ նպատակահարմար է, որ մասնավոր հաստատությունները ևս ունենան պատվաստանյութեր, որպեսզի ռիսկի խմբերում չընդգրկված անձինք ավելի արագ կարողանան դիմել ու պատվաստվել:
– Կարո՞ղ ենք արձանագրել, որ Հայաստանը հիմնականում աշխատում է Սպուտնիկ V պատվաստանյութի ուղղությամբ:
– Աշխատում ենք բոլոր ուղղություններով, բայց ամենայն հավանականությամբ առաջինը կարող է լինել Սպուտնիկ V-ն: Իսկ թե երբ դա կլինի՝ ես չեմ կարող հիմա ասել: Հնարավորինս մոտ ապագայում:
– Հաշվի առնելով, որ կորոնավիրուսը Հայաստանում նոր բռնկման միտում է ցուցաբերում, կարո՞ղ են պատվաստանյութի ձեռք բերման, կիրառման հետ կապված գործընթացներն արագանալ:
– Իհարկե, ամեն ինչ արվում է, որպեսզի ժամ առաջ, հնարավորինս կարճ ժամկետում լինի պատվաստանյութը, բայց դա ոչ միայն առողջապահության նախարարությունից է կախված, այլ նաև բանակցող մյուս կողմից է կախված: Ամեն օր ակտիվ բանակցություններ են իրականացվում, որպեսզի հնարավորինս մոտ ապագայում հասանելի լինի ՀՀ քաղաքացիներին:
– Հայաստանի համար ավելի ձեռնտու է Սպուտնիկ V ձեռք բերե՞լ, թե՞ նաև եվրոպական, ամերիկյան պատվաստանյութեր: Արդյոք գնային շատ մեծ տարբերություններ կա՞ն:
– Քանի որ հիմա բանակցությունների փուլում ենք, գնային առումով հստակ բան չեմ կարող ասել, թե կոնկրետ որն է ձեռնտու, բայց, համենայնդեպս, ամեն ինչ արվում է, որ և՛ արդյունավետ, և՛ անվտանգ, և՛ գնային առումով ընդունելի տարբերակներ ընտրվեն:
– Մենք կորոնավիրուսի բռնկման նոր իրավիճակի հե՞տ գործ ունենք, որովհետև թվերն ամեն օր աճում են:
– Այո, թվերն աճում են, և դա համաճարակաբանական օրինաչափություն է: Կարող ենք արձանագրել, որ նորից ակտիվացում է գնում, հիվանդացությունը բարձրանում է: Այսինքն՝ նոր համաճարակաբանական փուլ ենք մտնում:
– Կոնկրետ ժամկետ կա՞, թե երբ բոլոր քաղաքացիներին կկարողանանք պատվաստել:
– Ես ժամկետ չեմ կարող նշել, որովհետև ամեն ժամ իրավիճակը փոխվում է: Եթե կոնկրետ օր նշվի, կարող է այդ օրը դա տեղի չունենալ, և դա կդառնա սխալ տեղեկատվություն: Նախարարության կողմից ամեն ինչ արվում է, որ պատվաստանյութը շատ մոտ ապագայում հասանելի լինի:
