«Առաջին լրատվական»-ի զրուցակիցն է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն:
– Վրաստանի Քութայիս քաղաքի կենտրոնում բողոքի բազմահազարանոց ցույց է տեղի ունեցել, որի մասնակիցները պահանջում են դադարեցնել ՀԷԿ–ի կառուցումը Ռիոն գետի վրա, ինչպես նաև երկրի էկոնոմիկայի նախարարի հրաժարականը: Ի՞նչ իրավիճակ է հիմա, և ինչի՞ կարող են հանգեցնել այս զարգացումները:
– Այստեղ ամեն ինչ պարզ է. և՛ ՀԷԿ-ը կառուցողները, և՛ իշխանությունները նորմալ հաղորդակցություն չունեն բնակչության հետ: Բնակչությանը չեն բացատրել, թե ինչի մասին է խոսքը, և ինչու դա վտանգավոր չէ: Այն մարդկանց, որոնց դա անմիջականորեն առնչվում է, չեն առաջարկել եկամուտ այն հողերի վարձակալությունից, որոնց վրա այդ մարդիկ ապրում են և ապրել են իրենց նախնիները: Հանրությանն ընդհանուր առմամբ չեն բացատրել՝ ինչու է անհրաժեշտ այդ ՀԷԿ-ը: Արդյունքում հազարավոր դժգոհ մարդիկ կան, որոնք բարկացած դուրս են եկել փողոց: Եթե դուք չեք ուզում խոսել մարդկանց հետ, մարդիկ անպայման կստիպեն ձեզ խոսել իրենց հետ: Սա է ամբողջ պատմությունը:
– Ի՞նչ իրավիճակ է Վրաստանում այսօր, արդյոք հնարավո՞ր են անկանխատեսելի զարգացումներ:
– Մեզ մոտ ինչ ասես հնարավոր է՝ թե՛ որպես կանխատեսելի, թե՛ որպես անկանխատեսելի զարգացում: Երբ ամբողջ տարածաշրջանն ապրում է Մերֆիի օրենքով, ոչ մի առիթ չեմ տեսնում, որ Վրաստանը բացառություն լինի:
– Եվրոպական խորհրդի նախագահի ներկայացուցիչը հայտարարել է, որ Վրաստանում իրավիճակը մտահոգում է ԵՄ-ին: Ի՞նչ ազդեցություն կարող է ունենալ ԵՄ-ն Վրաստանի ներքաղաքական իրավիճակի վրա:
– Մեծ ազդեցություն կարող է ունենալ, քանի որ մենք ԵՄ-ի հետ ասոցացման, ազատ առևտրի ու զարգացման պայմանագիր ունենք: Այդ պայմանագրերը իմաստ ունեն, եթե մենք ուզում ենք լինել ժողովրդավարություն: Իսկ եթե մենք չենք ուզում մտնել ԵՄ, ապա ժողովրդավարությունը ոչ միայն պետք չէ, այլև վնասակար է: Հետևաբար մեր քաղաքական գործիչները և առաջին հերթին իշխանությունները ստիպված են հաշվի առնել այդ հանգամանքը:
