Մամուլն արդեն լուրեր է շրջանառում, որ Ամուլսարի շահագործման հարցով վերջնական որոշումն արդեն կայացվել է, և առաջիկայում հանքի շահագործման թույլտվությունը վերջնականապես կհաստատվի: Ավելին, ըստ թերթերից մեկի տեղեկությունների, նույնիսկ Գեղարքունիքի մարզում գտնվող Սոթքի ոսկու հանքի աշխատակիցներին այս ժամանակահատվածում «Գեոպրոմայնինգ» ընկերությունը բանավոր խոստանում է, որ առաջիկայում Ամուլսարը շահագործվելու է, և ազատվածները կարող են այնտեղ տեղավորվել աշխատանքի:
Հիշեցնենք, որ վարչապետ Նիկել Փաշինյանը 1in.am-ին տված իր վերջին հարցազրույցում անդրադարձել էր նաև Ամուլսարի հանքի շահագործման հարցին և ասել էր, որ հավանականությունը մեծ է, որ հանքը կշահագործվի։
Ջերմուկցի, ակտիվիստ Շիրակ Բունիաթյանը «Առաջին լրատվական»-ի հետ զրույցում ասաց, որ Ամուլսարի տարածքում որևէ աշխուժություն չի նկատվում, որևէ շարժ չկա։ Թերևս այն պատճառով, որ տարածքում մոտ երկու մետրի հասնող ձյան շերտ կա։ Հաշվի առնելով եղանակային պայմանները, ինչպես նաև պատերազմական վիճակը, ջերմուկցիները ներկայումս մշտական հսկողություն չեն սահմանում Ամուլսարի պոստերում, բայց ցանկացած շարժի մասին իրենք արագ տեղեկանում են և, անհրաժեշտության դեպքում, քայլեր ձեռնարկում։ «Երբ պատերազմը սկսվեց, մենք նպատակահարմար չգտանք ճանապարհները փակ պահել։ Բացի դրանից էլ, մեզանից շատ շատերը կամավոր մեկնեցին պատերազմ ու, ցավոք, կեսը չվերադարձան։ Պատերազմի առաջին օրերից Ամուլսարի մուտքերը բաց են, թռուցիկ ձևով է իրականացվում հերթապահությունը, բայց, քանի որ ջերմուկ քաղաքում գրեթե բոլորը դեմ են հանքարդյունաբերության իրականացմանը, ապա ցանկացած անցնող-դարձող բնակիչ ուշադրություն է դարձնում, տեսնում՝ ներսում ինչ-որ աշխուժություն կա՞, թե՞ ոչ։ Այսինքն՝ վիճակը կոնտրոլի տակ է, ու առայժմ ամեն ինչ հանգիստ է»,- ասաց Բունիաթյանը՝ հավելելով. «Վստահ կարող եմ ասել, որ եթե կառավարությունը վերջնական որոշում է կայացրել, ապա ժողովուրդը վաղուց է իր վերջնական որոշումը կայացրել, դեռ 2018 թվականին, երբ փակվեցին Ամուլսարի մուտքերը։ Կարծում եմ, որ առիթի դեպքում մարդիկ մեկ անգամ նորից դուրս կգան իրենց վերջնական որոշումը վերահաստատելու համար»։
Շիրակ Բունիաթյանը նաև ասաց, որ կառավարության ցանկացած որոշման դեպքում Ջերմուկի բնակչությունը շատ արագ կարձագանքի ու քայլեր կձեռնարկի։ «Ես բացառում եմ, որ եթե կառավարությունը որոշում կայացնի Ամուլսարը շահագործել, դա հանգիստ տեղի ունենա։ Ես դա բացառում եմ։ Բացի դրանից՝ Արցախյան վերջին պատերազմում զոհված ջերմուկցի տղաները թաղված են Ամուլսարի լանջին, ու, բացի բոլոր բնապահպանական ու այլ խնդիրներից, Ամուլսարը այլևս փոխել է իր նշանակությունը ջերմուկցու համար, որովհետև այնտեղ արդեն հերոսներ են թաղված»,- ասաց Բունիաթյանը։
Մեր դիտարկմանը՝ եթե ամեն դեպքում կառավարությունը գնա ուժի կիրառման ճանապարհով, ինչպիսի՞ն կլինի արձագանքը, Բունիաթյանը պատասխանեց. «Մենք հետքայլի տեղ չունենք։ Եթե մտել ենք այս պայքարի մեջ, բոլոր ռիսկերը գնահատել ենք ու հետդարձի ճանապարհ չունենք։ Սա մեր օջախի, մեր ծննդավայրի խնդիրն է ու մեր որոշումն անբեկանելի է»։