Հայաստանում շարունակվում են կեղծ տեղեկություններ տարածվել։ Հրանտ Բագրատյանը խոսում է Ազատամուտում ռուս զինվորականների սահմանազատման աշխատանքների մասին, իսկ ՊՆ-ն հերքում է և պարզաբանում, որ ռուս զինվորականները Տավուշում էին հայտնվել այլ նպատակով։ Հետո համացանցում տեսանյութ է տեղադրվում, որտեղ երևում է, թե ինչպես են ադրբեջանցիները Սյունիքի մարզում ազատ ելումուտ անում, բայց պարզվում է, որ այդ տեսանյութը մեկամսյա վաղեմություն ունի։
Մինչև ե՞րբ մեր հասարակությունը պետք է նման տեղեկություններ լսի, սթրեսի ենթարկվի․ «Առաջին լրատվական»-ի հարցին վերլուծաբան Հակոբ Բադալյանը պատասխանեց․ «Եթե խոսենք կոնկրետ տարածված տեղեկությունների մասին, ապա շատ պարզ ու հասկանալի է, որ դրանք նպատակային կիրառվում են որպես քաղաքական տեխնոլոգիա այն պայքարի շրջանակում, որը որդեգրել է արմատական ընդդիմությունը հետպատերազմյան այս շրջանում։ Դրա նպատակը հանրությանը միշտ տագնապի իրավիճակում և հոգեվիճակում պահելն է, և դրա շնորհիվ իշխանության հանդեպ անվստահության խորացնելը, որով կփոխեն հանրային տրամադրությունների բալանսը։ Չեմ կարծում, թե դրանով ուզում են բարձրացնել վստահությունն արմատական ընդդիմության նկատմամբ, բայց այստեղ խնդիրը դրված է այն իմաստով, որ հասարակության վերաբերմունքն իշխանության հանդեպ փոխվի, և անվստահությունը խորանա։ Այդ միջոցով նրանք ցանկանում են վերացնել տարբերությունն այն հանրային աջակցության, որն այժմ ակնհայտորեն կա, և այն ոչ հօգուտ ընդդիմության է։ Այս տեսանկյունից կա ևս մեկ հանգամանք, թե ինչու չի կարող ակնկալվել ընդդիմության հանդեպ վստահության բարձրացում, որովհետև, կարծում եմ՝ մեդիադաշտում այդ կեղծ տեղեկություններն իրականացվում է տարբեր բևեռներով։ Այդ է պատճառը, որ այսօր շեշտը դրված է իշխանության նկատմամբ հանրության անվստահության խորացման վրա»։
Մանրամասները՝ տեսանյութում։