Ռուսական «Սպուտնիկ V» կորոնավիրուսի դեմ պատվաստանյութի ստեղծողները ներողություն են պահանջել Դեղամիջոցների եվրոպական գործակալության (EMA) նախագահ Քրիստա Վիրտումեր-Հոհեից, որը Ավստրիայում՝ Հունգարիայի օրինակով, ռուսական պատվաստանյութի շտապ հաստատման հեռանկարը համեմատել է «ռուսական ռուլետկայի» հետ:
«Մենք EMA-ի նախագահ Քրիստա Վիրտումեր-Հոհեից պահանջում ենք հանրայնորեն ներողություն խնդրել «Սպուտնիկ V»-ն անմիջականորեն հաստատած ԵՄ երկրների վերաբերյալ իր բացասական մեկնաբանությունների համար»,- ասվում է ռուսական պատվաստանյութի Twitter-ում տեղադրված հաղորդագրությունում:
Հայտարարության մեջ նշվում է, որ կարգավորիչի ղեկավարի մեկնաբանությունները «լուրջ հարցեր են առաջացնում EMA-ի փորձաքննության ընթացիկ գործընթացին հնարավոր քաղաքական միջամտության վերաբերյալ»:
Ընդգծվում է նաև, որ EMA-ն «որևէ այլ պատվաստանյութի վերաբերյալ նման հայտարարություններ իրեն թույլ չի տվել»:
Բացի այդ, «Սպուտնիկ V»-ի մշակողները նշել են, որ նման մեկնաբանությունները «անտեղի են և խարխլում են եվրոպական կարգավորիչի և նրա անցկացրած փորձաքննության նկատմամբ վստահությունը»: «Պատվաստանյութերը և EMA-ն պետք է քաղաքականությունից դուրս լինեն»,- հայտարարել են նրանք:
