«Առաջին լրատվական»-ի զրուցակիցն է առողջապահության նախկին նախարար Արարատ Մկրտչյանը։
– Պարոն Մկրտչյան, Հայաստանում հաստատվել է կորոնավիրուսով վարակվելու 508, մահվան՝ 4 նոր դեպք։ Առողջապահության նախարարը նշում է, որ պետք է վերադառնալ դիմակների կրման և այլ կանխարգելիչ միջոցառումների խիստ պահպանմանը։ Գործ ունենք կորոնավիրուսի երրո՞րդ ալիքի հետ։
– Բնական երևույթ է Covid-ի աճը, քանի որ մեծ կուտակումներ, իրար հետևից տարբեր հանրահավաքներ են, ինչի հետևանքով էլ բարձրացում է տեղի ունենում։ Մի քանի օր դեռ պետք է սպասենք, տեսնենք, քանի որ մեկ-երկու օրվա թվերի բարձրացումը դժվար թե հնարավորություն տա գնահատել։ Հիմա դիմակներին վերադառնալը և սոցիալական հեռավորություն պահպանելը ճիշտ տարբերակ է, քանի որ այն արդեն արդյունավետ է եղել։ Այսպիսով որոշ չափով կզսպենք հետագա թվերի բարձրացումը, ուղղակի մասսայական միջոցառումներից պետք է զերծ մնալ, կոնտակտները հնարավորինս սահմանափակել։ Մի փոքր ցուցանիշների նվազեցում, և արդեն մարդիկ թուլանում են, բոլորն էլ կոչ են անում զգոն լինել և չտրվել հանգստությանը, որովհետև ունենք պրոբլեմներ։ Հարցը միայն համակարգի դիմակայելու խնդիրը չէ, այսօր էլ հայտարարվել է, որ նախարարությունը նորից վերաբացելու է մի քանի հիվանդանոցային Covid կենտրոններ։
– Համակարգը կարո՞ղ է դիմակայել նոր ալիքին։
– Համակարգը կարող է դիմակայել, բայց դիմակայելուց զատ, ինչու մասսայական մեծ թվեր ունենանք, եթե կարելի է զերծ մնալ մեծ ծավալով շփումներից, կրել դիմակ և պահպանել հեռավորություն։
– Համատարած դիմակ չեն կրում։ Սա արդյո՞ք ցուցիչ է, որ Covid-ի հետ հանրությունը սովորեց ապրել կողք կողքի։
– Դա էլ կա, այլ ելք չունենք, պետք է ապրել և աշխատել, զբոսնել Covid-ի հետ։ Մեր կենցաղում, ապրելակերպում եղած փոփոխությունները որդեգրենք և գնանք առաջ։ Աշխարհը պետք է բացվի, այլևս անհնար է։
– Հայաստանը գնել է Sputnik V պատվաստանյութի 15.000 դեղաչափ՝ նախատեսված 7500 հոգու համար։ Արդյոք ճի՞շտ է սկզբում ռուսական պատվաստանյութի փորձարկումը։ Նախարարն ասում է, որ ամենանպատակահարմարն ենք ընտրել։
– Գիտեք, պատվաստանյութը ուսումնասիրման տեսանկյունից ժամանակ է պահանջում։ Եվ առհասարակ բոլոր պատվաստանյութերն էլ անցել են որոշակի փորձաքննական ժամանակաշրջան՝ մեկի մասին շատ ավելի շատ են դրական կարծիքները, մյուսի մասին մի քիչ ավելի քիչ։ Պատվաստման պրոցեսն ամբողջ աշխարհում նոր է սկսվել, և տարանջատել ռուսական, եվրոպական, ճապոնական պատվաստանյութերը, անիմաստ միջոցառում է, բոլորն էլ 90 տոկոսով անընկալություն և արդյունավետություն ապահովում են։
Պետությունը, որքան հասկանում եմ, ձեռնարկում է միջոցառումներ տարբեր երկրների արտադրանքը ներկայացնել, ունենալ, և նաև ինձ թվում է՝ մասնավոր կազմակերպություններն էլ կներկրեն և վճարովի տարբերակներ կառաջարկեն, ցանկացած պատվաստանյութ ունի որոշակի բարդությունների տոկոս, թույլատրելի սահմաններում ունեն բարդություններ առաջացնելու հատկության որոշակի տոկոս, և արդեն իսկ բավականաչափ կիրառում ունենք, և արտառոց դեպքեր չեն արձանագրվել։
– 65 տարեկանը լրացած, խրոնիկական հիվանդություններով տառապողները, փակ հաստատություններում անձինք։
– Ցանկացած երկիր այդ բաժանումի դասակարգումն անում է, սկզբում որոշակի մասնագիտական տարբեր խմբեր են ընդգրկվում՝ բժիշկներ, ուսուցիչներ, սոցիալական ծառայություններ և նաև տարիքային, և հետո բնակչության վրա ծավալել։