ՀՅԴ ներկայացուցիչ, «Հայրենիքի փրկության շարժում» կուսակցությունների խմբի համակարգող Իշխան Սաղաթելյանը այսօր կայացած հերթական հանրահավաքի ժամանակ հայտարարեց, որ շարժման ներկայացուցիչներին նախագահ Արմեն Սարգսյանը հրավիրել է հանդիպման:
Նրա խոսքով՝ շատ հստակ Հանրապետության նախագահին ներկայացրել են իրենց պահանջը, ստացել են հավաստիացումներ, որ Գլխավոր շտաբի պետի ազատման պահանջով առաջարկություններով հարցը դիմվելու է Սահմանադրական դատարան:
«Մենք մինչև այս պահը վերջնական պատասխան չունենք ու ունենք ժամկետ մինչև երկուշաբթի օրը»,- հայտարարեց Սաղաթելյանը:
Նա, դիմելով նախագահին, նշեց, որ Սարգսյանն ունի անհատական, ամբողջական պատասխանատվություն երկրում ստեղծված իրավիճակի համար:
«Դուք պարտավոր եք կանգնել Սահմանադրության գլխին և մինչև երկուշաբթի օրը շատ հստակ դիմել Սահմանադրական դատարան՝ հակասահմանադրական ճանաչելով Գլխավոր շտաբի պետի պաշտոնանկությունը, հակառակ դեպքում Դուք անձամբ պատասխանատվություն ունեք երկրում ստեղծված իրավիճակի և հետագա ելքի համար», – ասաց նա: