Եվրոպայի առաջնության որակավորման խմբային փուլի 3-րդ տուրում Հայաստանի ազգային հավաքականը Թբիլիսիում 5։0 հաշվով պարտվեց Վրաստանին։ Սա թերևս այն դեպքն է, երբ զիջել որակումը միանգամայն սխալ կլինի։ Տեղի ունեցածը ֆիասկո էր․ մեր հավաքականն ուղղակի խայտառակվեց սկզբունքային մրցակցի դեմ պայքարում։ Այո, մինչ այս հանդիպումը հպարտանում էինք մեր հավաքականով նույնիսկ հույսեր փայփայում Եվրոպայի առաջնության եզրափակիչ փուլում հայտնվելու, բայց․․․։ Կատարվածի մեջ որևէ մեկին մեղադրելը ճիշտ չի լինի։ Ճիշտ չի լինի նաև խոսել պարտության օբյեկտիվ կամ սուբյեկտիվ պատճառների մասին։ Մեղավոր են բոլորը, իսկ վրացիներից 5։0 պարտությունը ուղղակի ամոթալի է։
Որակավորման խմբայն փուլի առաջին խաղում Հայաստանի հավաքականը մրցակցի հարկի տակ 6։0 հաշվով զիջել էր Ռուսաստանին։ Զիջել էինք աշխարհի ուժեղագույն հավաքականներից մեկին, որը հանդիսանում է Եվրոպայի առաջնության բրոնզե մեդալակրին։ Ասել, որ մերոնք անցկացրին թույլ հանդիպում սխալ կլինի։Օբյակտիվորեն Ռուսաստանը մի գլուխ բարձր էր և չտվեց հնարավորություն գոնե ավելի փոքր հաշվով պարտվելու։ Դաշտի տերերը կիրառելով պրեսինգ թույլ չէին տալիս մերոնց դուրս գալու սեփական կիսադաշտից։ Մոտ, 12 Հայաստանի հավաքականի հաջողվեց անառիկ պահել սեփական դարպասը, բայց․․․։ «Մենք երիտասարդ թիմ ունենք և առաջին քայլերն ենք անում: Մենք դեռ կպայքարենք երկրորդ տեղի համար: Իհարկե, մենք խաղում էինք, ես կասեի, ոչ թե Եվրոպայի, այլ աշխարհի ուժեղագույն հավաքականներից մեկի հետ: Բնականաբար, մենք կդիտենք, կփորձենք վերլուծել և հասկանալ՝ որոնք էին մեր թույլ կողմերն այս խաղում: Հիմա մենք պետք է պատրաստվենք հաջորդ՝ Ֆրանսիայի հավաքականի հետ հանդիպմանը:Տղաները պայքարեցին մինչև վերջ, չհանձնվեցին: Դա ամենակարևորն է: Նշանակում է, որ մենք ոգու ուժ ունենք: Մյուս շրջափուլում դեռ կլսեք Հայաստանի հավաքականի մասին: Մենք արդեն բավականին ուժեղ թիմ ունենք»,- խաղից հետո ասել էր մեր հավաքականի գլխավոր մարզիչ Ռուբեն Նազարեթյանը: Վերջինիս դիտարկումները կարելի է որակել օբյեկտիվ։
Իսկ ինչպես կարելի է մեկնաբանել երեկ Թբիլիսիում տեղի ունեցածը։ Առաջին հայացքից թիմերը հավասար էին, իսկ մերոնք կարծես ավելի շատ էին տիրում գնդակին։ Կարող ենք ասել, որ մերոնք պայքարեցին մինչև վերջ և չհանձնվեցին։ Հարցի պատասխանը կթողնենք անպատասխան։ Այս հանդիպումից առաջ մեր հավաքականը Երևանում ոչ-ոքի 4։4 էր խաղացել Ֆրանսիայի բավական ուժեղ հավաքականի հետ։ Ի դեպ, մերոնք առջևում էին 3։0 հաշվով սակայն չկարողացան պահպանել հաղթական հաշիվը։ Ֆրանսիացիների դեմ խաղում, սակայն մերոնք պայքարեցին և արժանի էին հաղթանակի։ Ցավոք չստացվեց։ Խմբային փուլի 3 հանդիպումներից 2-ում Հայաստանի հավաքականը չորս հաշվով պարտություն է կրել 11 անպատասխան գնդակ բաց թողնելով ռուսներից ու վրացիներից։ Որպեսզի երեկվա մեր մրցակցի մասին ավելի լավ պատկերացում ունենանք, նշենք, որ առաջին տուրում Վրաստանը նույն 4։4 հաշվով ոչ ոքի էր խաղացել Ֆրանսիայի հետ և սեփական հարկի տակ 0։4 հաշվով զիջել Ռուսաստանին։ Այսինքն, հիմնվելով գրանցված արդյունքների վրա կարող ենք ասել, որ Հայաստանն ու Վրաստանը խաղամակարդակով հավասար հավաքականներ են։
Ինչևէ, արդեն մարտի 10-ին Հայաստանի հավաքականը Վրաստանի հետ մրցելու է արդեն Երևանում։ Մնում է հուսալ միայն, որ սեփական հարկի տակ մեր հավաքականը ոչ միայն չի խայտառակվի, այլև ռևանշի կհասնի։ Ռուսաստանի հավաքականը ենթախմբում տոնեց երրորդ անընդմեջ հաղթանակը 3։2 հաշվով առավելության հասնելով Ֆրանսիայի նկատմամբ։ Ռուսներն 9 միավորով գլխավորում են մրցաշարային աղյուսակը։ Երկրորդ տեղում վրացիներն են 4 միավորով։ Ֆրանսիան 1 միավորով երրորդն է։ Հայաստանի հավաքականը ևս ունի մեկ միավորով, սակայն լրացուցիչ ցուցանիշներով զիջում է Ֆրանսիային և եզրափակում մրցաշարային աղյուսակը։