ՀՀ Ազգային ժողովն ընդունել է Ադրբեջանի վերահսկողության ներքո գտնվող ռազմագերիների և գերեվարված քաղաքացիական անձանց, այդ թվում՝ կանանց հայրենադարձումը խոչընդոտելու և անհարկի ձգձգելու Ադրբեջանի քաղաքականությունը դատապարտելու վերաբերյալ հայտարարություն, որտեղ միջազգային հանրությանը կոչ էին արել, որպեսզի դատապարտեն Ադրբեջանի այդ գործողությունները։ Շատերը նշում են, որ Ադրբեջանը դրանով փորձում է այս խնդրի, այսպես ասած՝ քաղաքական գինը բարձրացնել։
Կա՞ն արդյոք գործիքակազմեր, որոնցով կարելի է ավելի առարկայական ազդել Ադրբեջանի վրա․ «Առաջին լրատվական»-ի հարցին փաստաբան Գևորգ Դավթյանը պատասխանեց․ «Իհարկե, գործիքակազմ միշտ էլ կգտնես, միշտ էլ կլինեն, ու հենց դրանով է պայմանավորված, որ մեր իշխանությունները պետք է այդ գործիքակազմը հնարավորին չափ շատ օգտագործեն։ Այստեղ Հայաստանը ոչ թե ինքն իրենով պետք է պարտադրի Ադրբեջանին, այլ պետք է բարձրաձայնելով այն ներկայացնի միջազգային հանրությանը։ Եթե չեմ սխալվում, օրեր առաջ միջազգային կազմակերպությունների կողմից հայտարարություններ եղան, որ Ադրբեջանը պարտավոր է բոլոր գերիներին վերադարձնել։ Կարծում եմ՝ այդ շրջանակը պետք է մեծանա, և նման գործիքակազմեր պետք է օգտագործվեն»։
Իսկ իրավապաշտպան Ժաննա Ալեքսանյանն ասաց․ «Ես կուզենայի ընդգծել այստեղ Ռուսաստանի դերը։ Սկզբում նրանք դրա հետ կապված հայտարարություններ էին անում, իսկ հիմա, կարծես թե, մենք չենք լսում նման հայտարարություններ։ Ես ծանոթ չեմ Ազգային ժողովի կողմից ընդունված այդ հայտարարությանը։ Այդտեղ կա՞ Ռուսաստանի միջնորդությանը վերաբերող ուղղվածություն։ Լավ կլինի, որ մենք նաև Ռուսաստանին արթնացնենք։ Ես նկատի ունեմ, որ պետք է Ռուսաստանին պահանջ դնենք։ Չէ որ ասում էին, որ իրենք են միջնորդել»։