44-օրյա պատերազմից 4 ամիս անց Եվրահանձնաժողովը դատապարտել է Շուշիի Սուրբ Ղազանչեցոց եկեղեցու ռմբակոծումը, Արցախում հուշարձանների ոչնչացումը։
Սա քաղաքական առումով ի՞նչ ազդակ է Եվրոպայից․ «Առաջին լրատվական»-ի հարցին «Օրբելի» կենտրոնի փորձագետ Նարեկ Մինասյանը պատասխանեց․ «Նախ՝ պետք է արձանագրել, որ տվյալ պատասխանն արձանագրվել է ի պատասխան հայկական կողմից ներկայացված հարցման, և բավական կարևոր գնահատական է։ Խոսքը վերաբերում է ոչ միայն Շուշիի Սուրբ Ղազանչեցոց եկեղեցուն, այլ նաև Արցախում հայկական պատմամշակութային հուշարձանների ոչնչացման խնդրին։ Նման գնահատականը Եվրահանձնաժողովի կողմից կարևոր է տվյալ խնդիրը հետագայում ևս ուշադրության կենտրոնում պահելու համար, և ինչ-որ առումով նաև Ադրբեջանին զսպելու տեսանկյունից։
Գաղտնիք չէ, որ ադրբեջանական կողմը իր վերահսկողության տակ անցած Արցախի տարածքներում արդեն իսկ սկսել է ակտիվ քարոզչական աշխատանքներ իրականացնել։ Մասնավորապես, խոսքը վերաբերում է նրան, որ պաշտոնական Բաքուն հայկական քրիստոնեական հուշարձանները փորձում է ներկայացնել որպես ուդիական հուշարձաններ։ Բացի դրանից՝ արդեն իսկ արձանագրված են տարբեր հուշարձանների նկատմամբ վանդալային վերաբերմունք՝ որոշ հուշարձաններ ենթարկվել են ոչնչացման, որոշ հուշարձաններ մասամբ են վնասվել։ Հետևաբար, ճիշտ է՝ Շուշիի Սուրբ Ղազանչեցոց եկեղեցին շատ կարևոր է, սակայն Եվրահանձնաժողովի կոչը չի սահմանափակվում միայն Շուշիի Սուրբ Ղազանչեցոց եկեղեցով։ Այսինքն՝ Արցախի հայկական ժառանգության խնդրի մասին է բարձրաձայնվում, և բավական կարևոր է, որպեսզի նմանատիպ արձանագրություններ լինեն նաև այլ կառույցների կողմից»։
